Charter Document - 06010191

A tous chiaus qui ches lettres verront Gilles de Compiengne prevos de Peronne salut en Nostre Seigneur Sachent que comme mesire Gilles de Roye jadis chevalier eust vendu a homes honnerables et discres au capitre de l'eglise de S Foursi de Peronne IIII hostises qu'il avoit a Maurepast lesquels il tenoit du capitle devant dit Nicholes de Clari que je envoiai a medame Marien qui fu femme monsieur Gillon desseur dit comme prevost en liu de mi et li homme le Roy qui i furent m'ont tesmogniet que medame Maroie devant dite werpi et quita par devant yaus au capitle devant dit toute le droiture qu'elle avoit ou pooit avoir es dites hostises par raison de douaire ou par quel raison que che fust et proumist par se foy pluevie que jamais riens n'i demanderoit ne ne feroit demander Si fu comme hom le Roy aveuc chelui Nicholon qui en men liu y estoit ales mesire Bertaus de Hamel mesire Ansaus Bote chevaliers et Hues Cretons et en tesmognage de chou je ai mis men seel a cheste lettre sauve le droiture le Roy et d'autrui Che fu fait l'an de l'lncarnation Nostre Seigneur MCCLXXIII en moys de may