Charter Document - 06010136

Gregorius episcopus servus servorum Dei dilectis filiis [] decano [] archidiacono Ostrevanensi et Guillelmo de Palude canonico Atrebatensi salutem et apostolicam benedictionem Significantibus dilectis filiis [] decano et capitulo Sancti Fursei Peronensis nobis innotuit quod cum dilectus filius noster R Portunensis electus tunc apostolice sedis legatus mandasset eisdem ut ecclesie sue statum in melius reformarent et ipsi ad hoc faciendum magistrum Thomam de Provino tunc decanum eorum P cantorem et quosdam alios suos concanonicos deputassent iidem de stando super hoc eorum ordinationi recepto a singulis ipsorum et canonicis quondam ecclesie Sancti Leodegarii loci ejusdem que destructa fuerat propter quod ad ecclesiam se transtulerant eorumdem capellanis quoque et vicariis ejusdem ecclesie Sancti Fursei corporaliter juramento deliberatione provida statuerunt quod dicti decanus et capitulum quosdam redditus qui duodene vocantur et quilibet predictorum canonicorum Sancti Leodegarii capellanorum quoque ac vicariorum ejusdem ecclesie Sancti Fursei unum modium frumenti annuatim conferrent et eo vendito de ipsius pretio et prefatis redditibus cotidiane distributiones fierent quas illi duntaxat de canonicis Sancti Leodegarii capellanis etiam ac vicariis predictis predictas perciperent qui matutinis et aliis divinis officiis horis debitis interessent Sed quidam eorum statutum hujusmodi non observant in non modicum ipsius ecclesie detrimentum que per hoc debitis obsequiis defraudatur cum igitur que ad cultum Domini ampliandum provide statuuntur robur debeant firmitatis habere discretioni vestre per apostolica scripta mandamus quatinus statutum ipsum sicut provide factum est faciatis per censuram ecclesiasticam appellatione remota ratione previa firmiter observari Quod si non omnes hiis exequendis potueritis interesse duo vestrum ea nichilominus exequantur Datum Anagnie XII kalendas januarii pontificatus nostri anno sexto