Charter Document - 06010004

In nomine Patris et Filii et Spiritus Sancti Ego Baldricus Dei gratia Noviomensium episcopus universis christiane religionis cultoribus eterne beatitudinis hereditatem quam promisit Deus se diligentibus Quum inclita patrum providentia ecclesiastice libertatis dignitatem rite consuevit commendare litteris quatinus sic possit representari posteris eorum prosequentes celeberrimam auctoritatem quod pro statu sancte Dei ecclesie agimus universorum fidelium memorie commendari volumus Sciat ergo presens etas et futura sciant sancte matris nostre Noviomensis ecclesie filii presentes et futuri dissensionem quandam in Peronensi castro inter ejusdem Peronensis ecclesie canonicos et ministros nostros de eorum decimis et oblationibus et quarumdam rerum venalium consuetudinibus exorta longoque in tempore ventilata et etiam ad aures domini Pascalis pape propalata ejusdem domini pape Paschalis dominique Manasse Remensis archiepiscopi precepto et auctoritate nostro in tempore hoc modo sopita et conciliata fuisse decrevimus siquidem et nostrorum clericorum consilio et assensu statuimus ut prefate Peronensis ecclesie canonici ipsius castri decimas et oblationes rerumque venalium consuetudines omniaque parochialia jura de quibus agebatur salva pontificali dignitatis reverentia et justitia perpetuo habeant Statuimus etiam et eisdem assentientibus confirmavimus ut nos et ministri nostri archidiaconus scilicet et decanus in ejusdem ecclesie parochianos de pacis violatione de criminalibus de conducendis penitentibus eandem quam antea potestatem habeant Si vero nostram in presentiam vel in presentiam eorundem ministrorum nostrorum moniti fuerint et ad justitiam venire noluerint postquam ipsi canonici nostras seu archidiaconi nostri litteras inde susceperint et per eorum commonitionem ad justitiam nostram sicut predictum est venire contempserint audita nostra vel archidiaconi nostri excommunicatione a eis postea inter christianos detur cummunio sed per eosdem canonicos ab omni fidelium excommunicentur consortio quousque resipiscant et ad emendationem et satisfactionem nostram veniant crisma et oleum oleum etiam infirmorum uno quoque anno a decano nostro ipsi canonici suscipiant et baptizandi atque inungendi suis in parochiis potestatem habeant Concessimus etiam et eadem qua predictum est auctoritate confirmavimus eisdem canonicis et eorum successoribus altare de Reigesth perpetua sub libertate tenendum ea tamen conditione quod eorum decanus ejusdem altaris curam gerat et synodalia jura solvat Quandoquidem igitur domini pape Paschalis dominique Manasse Remensis archiepiscopi sicut predictum est precepto et auctoritate nostro autem nostrorumque clericorum assensu supradicta confirmavimus prebendam que ab eisdem canonicis in ecclesia Sancti Fursei nobis nostrisque successoribus ecclesie scilicet Noviomensis episcopis perpetuo tenenda concessa est sub ejusdem privilegii auctoritate et inscriptione confirmavimus eorumque assensu et consilio presentium atque futurorum fidelium memorie commendavimus Quod ut nostris seu futuris in temporibus ratum maneat utrarumque partium nostrorum videlicet clericorum et Peronensium canonicorum consilio et assensu corroboravimus et ne ulterius ab aliquo violetur sub anathemate interdiximus atque sigilli nostri impressione consignavimus Actum Noviomi anno dominice Incarnationis MCII indictione X regnante rege Philippo episcopante domino Baldrico Hec eadem prescriptio Remis est recitata sub presentia domini Manasse archiepiscopi eodem anno dominice Incarnationis eadem indictione V idus maii signis atque testimoniis autenticarum personarum approbata et sub anathemate perpetuo confirmata Signum Manasse archiepiscopi Remensis + S Baldrici Noviomensis episcopi + S Sancte Remis ecclesie S Radulfi prepositi S Goisfridi decani S Richeri cantoris S Magistri Odalrici S Fulcradi cancellarii S Isenbardi S Adam S Sancte Noviomensis ecclesie S Rotelini decani S Gerardi archidiaconi S Hugonis thesaurarii S Roriconis prepositi S Petri cantoris S Landrici succentoris S Genardi magistri Ego Wido cancellarius subscripsi + In nomine Patris + Privilegium Sancti Fursei +