Charter Document - 06004128

Universis presentes litteras inspecturis R[ainaldus] divina patientia abbas humilis Beate Marie de Homblieres ordinis sancti Benedicti Noviomensis dyocesis totusque loci eiusdem conventus salutem in Domino sempiternam Noverit universitas vestra quod cum inter nos ex una parte et viros religiosos abbatem et conventum Sancti Foyllani de Rodio ordinis Premonstratensis ex altera discordia verteretur super eo quod prefati religiosi Sancti Foyllani dicebant medietatem decimarum cuiusdam pecie terre site prope Malum Ingenium quam nos incluseramus intra curtem nostram de Curcelles et eam reduxeramus ad culturam ortorum nostrorum esse suam et eos esse et fuisse in possessione vel quasi a tenpore a quo non erat memoria percipiendi et habendi medietatem decimarum predictarum nobis in contrarium asserentibus et dicentibus nos esse liberos a solutione huiusmodi decimarum eo quod religiosi generaliter sunt exempti a prestatione decimarum ortorum suorum et etiam cum habeamus super hoc privilegium speciale et dicebamus nos esse privilegiatos a sede apostolica quod non tenebamus solvere decimam orthorum predictorum Ipsis religiosis Sancti Foyllani contrarium asserentibus et dicentibus quod ante clausuram et post consueverant in loco predicto percipere medietatem decimarum predictarum et habere Tamdem de prudentum et bonorum virorum consilio super dicta discordia compromisimus in viros discretos et honestos videlicet R decanum christianitatis de Ribodimonte et magistrum Iohannem Hanstarum curatum ecclesie Sancti Eligii in Sancto Quintino arbitros sive arbitratores seu amicabiles compositores nos et prefati abbas et conventus Sancti Foyllani sub hac forma quod quicquid dicti arbitri sive arbitratores seu amicabiles compositores super dicta discordia arbitrarentur ordinarent dicerent seu componerent de alto et basso inviolabiliter observaremus sub pene quadraginta librarum parisiensium parti observanti arbitrium ordinationem dictum seu compositionem ipsorum a parte resiliente reddendarum arbitrio ordinatione dicto seu compositione eorum nichilominus firma et stabili permanente Qui arbitri arbitratores seu amicabiles compositores arbitrium suum ordinationem dictum sive compositionem partibus presentibus protulerunt in hunc modum quod dicta medietas dictarum decimarum erit nostra et eam percipiemus et habebimus in futurum Pro qua medietate nos tenemur acquirere ad opus dictorum abbatis et conventus Sancti Foyllani viginti duos denarios parisienses et obolum annui et perpetui redditus sub dominio et districtu eorum vel alibi prope districtum suum bene et sufficienter assignatum et reddere eos eis et solvere singulis annis in festo Omnium Sanctorum donec fuerint ut dictum est acquisiti et assignati et ex tunc in antea erimus liberi et immunes a solutione eorumdem Et tenebuntur dicti abbas et conventus Sancti Foyllani predictum acquestum si sub districtu et eorum dominio fuerint inventi concedere laudare et approbare tamquam domini loci Nos vero arbitrium ordinationem dictum seu compositionem dictorum arbitrorum secundum quod superius est expressum laudamus et approbamus et promittimus nos inviolabiliter servaturos In cuius rei testimonium presentibus litteris sigilla nostra duximus apponenda Datum et actum anno Domini millesimo ducentesimo septuagesimo sexto mense iulio