Charter Document - 06002128

A tous chiaus qui ces letres verront li abbes et li couvens de Homblieres salus en nostre Segneur Sachent tout que com il eust descort entre nous dune part et entre les religieus hommes labe et le couvent de Saint Foillien dautre part de le grant disme de ces cans cest asavoir deu camp Gerart de Deheries qui siet eu liu con apele Brai eu sart qui fu Perron le Grant deu camp Waukier de Meurincourt qui siet eu liu devant nommei deu camp Frappart qui siet eu liu devant dit et deu camp Iehan de Harchies qui siet la meesmes es queis cans nous disiens que nous estiens en possession et en saisine de rechevoir le moitiet de le grant disme et ausi com il fust descors entre nous et iaus de le disme deu camp Frappart qui siet eu liu devant nommei con apele le courtisel Saint Eloy en quel camp nous disiens que nous estiens en possession et en saisine de rechevoir toute le disme et li devant dis abbes de Saint Foillien et li couvens disoient encontre que li disme des terres et des cans devant dis apartenoit a iaus et quil ont este en saisine et en possession de rechevoir le disme toute es lius devant dis A derains par conseill de bonnes gens pour bien de pais nous et li devant dis abbes et li couvens de Saint Foillien deu descort devant dit nous mesimes en arbitres cest asavoir mon segneur Wion de Noiasle chevalier et Bauduin de Fiulaines selonc la fourme de le mise de que li devant dis abbes et li couvens de Saint Foillien ont nos letres seelees et nous avons les leur A derains li devant dit arbitre quant it eurent enquise le verite deu descort devant dit par tesmoins souffissans et iureis per no volente et par le volentei deu devant dit abbe et couvent de Saint Foillien asisent iour a rendre leur dit de le mise devant dite Et a ce iour cil arbitre par conseill de bonnes gens et des hommes le roi rendirent leur dit en teil maniere cest asavoir que toute li disme deu camp devant nommei con apele le courtisel Saint Eloy nous demeure quite et empais a tous iours Et se dient en leur dit ques autres cans devant dis la ou li devant dis abbes et li couvens de Saint Foillien ou nous avons le terage que li disme demeurt a celui qui le terage i a Et sil i avoit aucun camp qui ne deust point de terage na nous na iaus li disme de celui camp ou de ces cans se plus en i avoit demouerra a celui qui i a le segneigrie Et nous ce dit en si com il est devant espresseis tenons ferm et estaule et pourmetons en bonne foi que iamais a nul iour ne venrrons encontre ce dit Et pour chou que che soit ferme chose et estaule ces presentes letres qui faites en sont nous les avons confremees de nos seiaus et donnees au devant dit abbe et couvent de Saint Foillien Che fu fait en lan de lincarnation nostre Segneur mil et CC et cuinquante nuef el mois de may