Charter Document - 06001128

A tous chiaus ki ces letres veront et ouront li abbes et li couvens de Homblieres salus en nostre Signer Sachent tout ke cum il eust descort entre nous dune part et entre les religieus homes labbe et le couvent de Saint Foylien dautre part de le grant dime de ches cans chest asavoir deu camp Gerart de Leheries ki siet eu liu con apele Brai eu sart ki fu Perron le Grant deu camp Wauchier de Muerincourt ki siet eu liu devant noume deu camp Frapart ki siet eu liu devant dit et deu camp Iehan de Harcies ki siet la meismes esques chans nous disiens ke nous estiens en possession et en saisine de recevoir le moitie de le grant dime et ausi cum il fust descors entres nous et le devant dit abbe et le couvent de Saint Foyllien de le dime deu camp Frapart ki siet eu liu devant noume cum apele le cortisel Saint Eloy que Frapars tient eu lieu devant dit es kes terres derrainnement noumees et eskes cans nous disiens que nous estiens en possession et en saisine de recevoir toute le dime de lonc tans ca en ariere et li devant dit abbes et li couvens de Saint Foylien disoient encontre ke li dime des terres et des cans devant dis apartient a aus et kil en ont este en possession et en saisine de recevoir le dime toute es lius devant dis A darrains par consel de bonnes gens pour bien de pais nous et li devant dit abbes et couvens de Saint Foyllien de descort devant dit nous soumes mis en arbitres cest asavoir mon signeur Wion de Noiasle chevalier et Bauduin de Fiulaines en tel forme ke li devant dit arbitre enquirront en bonne foi par tesmoins souffissant et iures cest avoir X tesmoins dune part et X dautre de la possession et de la saisine de la dime des terres devant noumees de nous et dou devant diet abbe et convent de Saint Foyllien et apres cou kil aront enquese la verite de ce descort il se doivent conselier as homes le roi de le court de Saint Quentin selonc la verite quil auront enquese Et ce que li doi arbitre par le consel des homes pournonceront et diront deu descort devant dit et selonc le forme devant dite nous et li devant dit abbes et couvens de Saint Foillien devons tenir fermement et a ce nous sommes nous aloie seur painne de XL lib de parisis a rendre au devant dit abbe et convent de Saint Foyllien se nous en aliens encontre et por ce ne demouroit mie que li dis des arbitres ne fust fers et estaules Et cest asavoir que li devant dit arbitre doivent rendre leur dit dedans le miquaresme et outre ce terme il ni ont pooir se ce nest par lasens des parties Et se sommes nous et li devant dit abbes et convens de Saint Foyllien tenu a envoier souffissanment a tous les iours que li devant dit arbitre meteront nous et aaus en ceste cause et li partie qui ensi ne le feroit renderoit a lautre partie pour chascun iour quille defauroit XX sols de parisis et pour ce ne demouroit mie que ceste mise ne fust ferme et estaule Et cest asavoir que li possessiens et li saisine de cest derrain aoust naide ne ne porte force a lune partie na lautre et que li une partie ne li autre ne puet cheir en la painne de XL lib de ci atant qui li arbitre aront dit leur dit Et toutes ces coses prometons nous a tenir fermement et ces coses sont faites sauf le droit de le propriete des dimes devant dites et a nous et a labbe et au convent de Saint Foillien devant dis Et pour cou que ce soit ferme chose et estaule nous avons cest present escrit conferme de nos saiaus Ce fu fait en lan de lincarnation nostre Signeur MCCLVIII el mois de decembre