Charter Document - 06000137

A tous ceuls qui ces presentes lettres verront et orront Iehan par la souffrance de Diu abbes del eglise Nostre Dame de Homblieres et tous li couvens de ce meisme lieu salut en nostre Signeur Comme religieux hommes et honneste li abbes et li couvens del eglise Saint Quentin en Isle fussent tenus envers nous et no dite eglise en certaines rentes perpetueles cest assavoir en trois muis de ble pour le cause et le raison des terres ou des plates disme que nous aviens en le ville et ou terroir de Regny laquelle disme est et sera puis ore en avant as dis religieux d Isle perpetuellment a tous iours Item en quatre saulz parisis pour le cause et pour le raison des dismes de leur maison de Caniery Item en vint et wit deniers parisis pour le cause et le raison de leur vigne de Bertignicourt Item en deulz saus parisis pour le cause et le raison dune de leur maisons que il ont feant en leur destroit d Isle en Saint Quentin qui fu iadis Iehan Abede Item en dis wit deniers parisis pour le cause et le raison dune piece de terre que il ont feant en leur terroir de Cameri tenant as terres de le dite eglise d Isle lequelle nous leur avons afranquise Et nous et no dite eglise fussiens tenus aussi envers yaulx et leur dit eglise en certaine rente perpetuelle ceit assavoir en chiunc muys de ble de no milleur ble apres la semence mene et conduit et mesure a no court en le maison et en leur abbeye d Isle a Saint Quentin pour le cause et le raison de no maison d Abeville Sacent tout que nous pour bien de pais et par le conseil de bonnes gens avons fait ensanble une amiable permutation perpetuel et dont cascune partie a bonne recompensation et rester souffissant des rentes dessus dites que il nous doivent et que nous leur devons en la fomme et en le maniere qui s ensievt Cest assavoir que nous no successeur et no eglise sommes et serons tenus casun an desorenavant a tous iours perpetuelment aux dis religieux d Isle a leurs successeurs et a leur eglise en deus muis de ble tant seulement pour tous les chiunt muis de ble dessus dis a per as terres chi dessous nommees et selonc les conditions chi dedens escriptes Premierement nous devons si paierons et renderons as dis religieux d Isle a leur successeurs et a leur eglise desorenavant cascun an a tous iours perpetuelment au iour de le feste Saint Andrieu l Apostre ou dedans les octaves deus muis de ble secq sain et moitain a le prisie et a le mesure de Saint Quentin conduit menet et mesuret a no court en leur abbeye d Isle a Saint Quentin et parmi lacort et tout ce qui est deseure dit et devise nous sommes quitte et delivre envers les dis religieux d Isle desorenavant a tous iours de trois muis de ble que nous leur deviesmes pour le raison de no maison d Abeville avec ces deulz muis de ble dessus dis lesquelz deux muis de ble nous leur devons et deverons a tous iours cascun an au iour dessus dit Et li seront et sont encore li dit religieux d Isle desoresmais en avant a tous iours quitte et delivre envers nous de toutes les rentes dessus dittes que il nous soloient desvoir cest assavoir de trois muis de ble des plates dismes de Regni dessus dittes des quatre sauls des vint et wit deniers des deus saus et des dis et wit deniers dessus dis Et quant a toutes les choses dessus dites et cascune delles fermement tenir et warder a tous iours nous obligons et aloions tous les biens de no eglise meubles et non meubles presens et avenir partout ou que il soient en puissent estre trouve pour prendre saisir arrester et detenir vendre et dependre tel fuer tel vente iusques a plain accomplissement de toutes ses coses dessus dites et les promettons a tenir et faire tenir et accomplir a tous iours loyaument en bonne foy sans aller iamais en nul iour ne venir ne faire aler ne venir par nous ne par aultrui encontre le permutation et lacort dessus dis En tesmoignage des quelz coses nous tous ensamble estans en no plain capitle pour le pourfit de nous et de no eglise avons mis nos seaulz a ces presentes lettres qui furent faites en lan de grace mil trois cens et neuf le mois davrill