Charter Document - 06000136

Sachent li maires et li eskievin de Homblieres qui sont et qui avenir sont et tout chil qui chest escrit verront et orront que messires Wautiers Lingnoles de Homblieres prestres cures de Houdain en se plainne vie et en se plainne sante donna pour Dieu et en aumosne a tous iours pour le salut de same as pitanches de leglise Nostre Dame de Homblieres se maison ensi com ele se porte devant et derriere que maistres Estievenes a tenu qui siet entre le maison dame Agnes Quaille qui fu et le maison dame Ade Cokenarde qui fu Renier des Clippes Apres avint que li pitanchier de le devantdite eglise Nostre Dame de Homblieres cest assavoir dans Gerars de Brenot et dans lakes de Camach donnent a hostage a main ferme a tous iours par le gre et par le volente de tout le convent de le devantdite eglise a Perron Quaille le devantdite maison ensi comme ele se porte devant et derriere parmi VIII sols de parisis chascun an dostage a tous iours que li devant dis Pierres ou si hoir ou si successeur ou chil qui le devantdite maison tenront sont tenut de payer as pitanciers de le devantdite eglise chascun an a II termes cest assavoir a feste Saint Remi eu chies doctembre IIII sols de parisis et au iour de miquaresme IIII sols de parisis Et est assavoir que li devantdis Pierres ou si hoir ou si successeur ou cil qui le devant dite maison tenront sont tenut daquiter chascun an le dite maison de tous cens et de toutes rentes cest assavoir a le devantdite eglise IIII capons au noel et XVI deniers a II termes VIII deniers a le Saint Remi et VIII deniers a miquaresme et le doit li dis Pierres amender dedens I an de le valeur de C sols de parisis bien et soufissamment par dit de menestreus eta de la en au an retenir bien et souffissamment Et sil avenoit par aventure que li devandit Pierres ou si hoir ou si successeur ou chil qui le dite maison tenront de fausissent de paier en aucun tans les VIII sols dostage devantdis as termes devantdis li pitanchier de ledite eglise porront recraire a le devantdite maison conme en leur hyretage a tous iours Ce fu fait par le maieur et par les eskievins de Homblieres devantdis par tenement et sauf tous drois ce seu eurent leur drois en lan de grasse mil CCC et V el mois de mai La fu conme maires Mahius Roussiaus et conme eskievin Reniers Testars Gerars li Parmentiers et lakes li Tuiliers