Charter Document - 06000134

A tous cheus ki ces letres verront Guillaumes de Hangiest baillius de Vermendois salus Comme plais de descors fust meus entre relegieus houmes labbe et le couvent de Hombelieres dune part et relegieus houmes labbe et le couvent dou Mont Saint Martin dautre sur che ke chil de Hombelieres se doloient ke chil dou Mont Saint Martin avoient leves fosses et deffenses ou liu dont veue a estet faite ou terroit de Fraisnoi en estoupant en destourbant et en empeechant et tourblant et de nouvel le cours de liaue deskavant disant ke kant li aue deskavant croissoit ou autre cretine de pluies li cours de ces yaues se desgorgoit parmi ces lius ou li dit fosset sont fait de nouvel et avoient leur droit cours par illuec a venir a Hombelieres et en sont et ont estet chil de Hombelieres en saisine de si lone tans ki convient a saisine aquerre et se autre fois chil dou Mont Saint Martin se sont efforchiet de faire fosses et deffense ou dit liu chil de Hombelieres ont estet en saisine de faire cheoir par coi il requeroient ke chil tourbles et chil empeechemens fust ostes par coi ladite yaue euist son droit cours per le liu desus dit se chil dou Mont Saint Martin connoissent ches coses et sil les noioient chil de Hombelieres en offroient a prouver che ke il leur souffiroit et la contre chil dou Mont Saint Martin disoient ke li lius dont veue estoit faite estoit en leur propre terre en leur demaine et ke il estoient et avoient estet eus ou chil dont il cause en saisine pasiule de si lone tans ki souffisoit a bonne saisine aquerre de faire fosses et deffenses ou liu desus dit pour destourber le yaue ke ele ne alast ne demourast en leur terres dou dit terroi et pour deffenses de leur terres et ke de ceste saisine avoient il use et esploitie de si lone tans kil devoit souffire par coi il disoient ke en ceste saisine il devoient demourer a ke chil de Hombelieres ne sen pooient doloir de nouvel tourble ne de nouvel enpeechement et en offroient a prouver che ke il leur souffiroit tiesmoins de cascune partie iures et examines diligamment veue et regardee la deposition des tiesmoins et tout che ke li une partie vaut dire et pourposer contre lautre en lassise de Saint Quentin ki fu le iuedi devant Paskes flories lan de grasse mil et quatre vins et XIX prounonchie fu et par droit des hommes le roi iugeours en la dite court ceus dou Mont Saint Martin avoir souffissamment prove leur entention et chil de Hombelieres mains souffisamment la leur par coi chil dou Mont Saint Martin demourront en la sasine de faire les dis fosses et deffense au dit liu et leur est aiugie la dite sasine sauf le droit de la propriete En tiesmoing de che nous avons mis en ces letres le saiel de la bailie de Vermendois lan et le iour desu dis Isti sententie proferende interfuerunt dominus Gobertus tunc existens istius ecclesie abbas frater Balduinus prior frater Gobertus de Muile prepositus et frater Ingerannus cappellanus et tanquam homines regis dominus Symon de Folloviel dominus Guido dictus Goulardus de Moy dominus Guillelmus de Lehaucourt et de Rouveroy dominus Oudardus de Hem dominus Iohannes de le Planoies dominus Iohannes de Ramicourt dominus de Fonsonmes senescallus de Vermendois dominus Guido dictus li Moines Iohannes de Hem Robertus de Gauchi Wiardus de Moyri Egidius de Roucourt Gerardus de Kievresis et Quintinus li Cambrelens Inquisitores autem cause huius fuerunt dominus Guido li Moines et Robertus de Gauchi predicti