Charter Document - 06000131

A tous chiaus qui ces letres veront Renaus par le souffranche de Ihsu Crist abbes del eglise de Nostre Dame de Honblieres et tous li couvens de ce meisme lieu salut en nostre Singneur Nous faisons a savoir a tous comme descors fust v[el] debas entre nous abbe et covent devant dis dune part et le maistre et les freres dele maison d Esterpenig del hospital doutre mer dautre part seur un cent d anguilles qe nous demandiemes as devant dis maistre et les freres et ke nous disiens qe nous deviens prendre et avoir sur les molins des Creutes a Frise ki sont dele maison d Esterpenig Et li maistres et li frere disoient quil estoit en leur volente de paier un cent d anguilles ou vint et chiunt sols de parisis Du quel descort pour bien de pais et par conseil de preudommes nous sommes mis et metons en arbitres arbitratheurs ou amiables compositeurs Cest asavoir en homes discreis maistre Renaut cureit de Brie et en monsingeur Renier cureit d Urvilleir sil se pueent acorder ensiaule et sil ne se pueent acordeir nous prendons et eslisons de maintenant entiers home relegiens labbe d Arrouaise et proumetons sur painne de quarante livres de parisis atenir fermement et estaulement chou qui fera dit et ordene de haut et de bas pour le miex par les devant dis Renaut et Renier sil se pueent acordeir en une sentensse Et sil ne se pueent acorder che que li abbes devant dis dira avoekes les deus miseurs devant dis ou avoekes lun des deus se tout troi ne se pueent acordeir Dies toutes voies tout premierement les bonnes raisons de lun partie et de lautre et le verite enquise selont leur pouvoir De lequel painne le moitiet doit estre rendue et le proumetons arendre au maistre et as freres devant dis selle estoit commise de par nous que ia naviugue et lautre moitiet au roi Et volons et otroions ke li iustice le roi nous puist constraindre a warder de tout en tout chou qi est contenu en ces presentes lettres et en cest compromis par le prise de nos biens Et a ces choses tenir proumetons nous et a nous en couvent et obligons nos biens envers le maistre et les freres devant dis Et si nous plaist bien que li arbitre puissent aleir avant eu compromis eu iour quil soit feste ou quil ne soit mie feste et otroions qe bonnes lettres de baillie en soient faites Et pour chou que ce soit ferme chose et estaule nous avons seele ces presentes letres de nos seiaus Ce fu fait en lan de grasse mil CCIIII et IX eu mois de mai