Charter Document - 06000118
| Charter Number: | 06000118 |
|---|---|
| Cartulary Title: | The Cartulary and Charters of Notre-Dame of Homblières |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1224 |
| Date type: | Internal, A.D. |
| Resource Link(s): |
Reference Document for this Embedded Document |
Charter:
B[alduinus] divina miseratione Humolariensis ecclesie dictus abbas totusque eiusdem loci conventus Omnibus hec visuris in Domino salutem Noverit universitas vestra quod cum vir excellentissimus et dominus noster L[udovicus] Dei gratia Francorum rex ex speciali dominio expeditionem et servitium pro expeditione ad submonitionem suam haberet super villam et super omnes homines et hospites nostros de Homblariis nos in hoc cum dicto domino rege convenimus quod ipse et expeditionem illam et servitium illud quod eidem regi pro dicta expeditione a dictis hominibus et hospitibus nostris de Homblariis debebatur et nobis et prefatis hominibus in perpetuum quittavit pariter et remisit nichil sibi iuris retinens in hac parte Quittavit etiam nobis et ecclesie nostre in perpetuum verrem unum quem ei singulis annis debebamus et coronam unam de racemis quam similiter ipsi regi annuatim debebamus et somarium unum quem eidem debebamus quando in exercitum ibat Nos vero in recompensationem omnium predictorum dicto domino regi donavimus et concessimus de cetero iure perpetuo et hereditario possidendum quicquid habebamus apud Novam Villam que sita est in bosco de Baine in omnibus proventibus in tota iusticia alta et bassa in toto districto illo et in omnibus appendiciis et pertinentiis illius ville et districti excepta tamen minuta decima que pertinet ad altare illius ville Donavimus etiam et concessimus cum premissis domino regi quicquid habebamus apud villam de Rumeliaco similiter in omnibus proventibus in tota iusticia alta et bassa in toto districto illo et in omnibus appenditiis et pertinentiis illius ville Propter hoc tamen absoluti non sumus a solutione triginta solidorum parisiensium quos singulis annis debemus domino regi pro pastu Preterea aliquem novum hospitem decetero in villam nostram de Homblariis recipere non possumus nec debemus qui expeditionem debeat domino regi Quod ut ratum sit et stabile presentem paginam sigillorum nostrorum appensione duximus confirmandam Actum anno domini MCC vicesimo tercio Mense februario