Charter Document - 06000117
| Charter Number: | 06000117 |
|---|---|
| Cartulary Title: | The Cartulary and Charters of Notre-Dame of Homblières |
| Charter Language: | Latin |
| Charter Origin: | Royal |
| Charter Type(s): | Abolition |
| Date: | 1224 |
| Date type: | Internal, A.D. |
| Resource Link(s): |
|
Charter:
In nomine sancte et individue Trinitatis Ludovicus Dei gratia Francorum rex Noverint universi presentes pariter et futuri quod cum nos ex speciali dominio expeditionem et servitium pro expeditione ad submonitionem nostram haberemus super villam et super omnes homines et hospites ville Homblariensis nos in hoc cum abbate Balduino et conventu ecclesie Humolariensis sub cuius iurisdictione et dominio dicta villa consistit convenimus quod expeditionem illam et servitium illud quod nobis pro dicta expeditione a dictis hominibus et hospitibus ville Humblariensis debebatur abbati et conventui predictis et prefatis hominibus et hospitibus in perpetuum quitavimus et remisimus nichil iuris in hac parte nobis in posterum retinentes Quitavimus etiam dictis abbati et conventui in perpetuum verrem unum quem nobis singulis annis debebant et coronam unam de racemis quam similiter nobis annuatim debebant et quitavimus eis sommarium unum quem nobis debebant quando in exercitum ibamus Memorati vero abbas et conventus in recompensationem omnium predictorum nobis donaverunt et concesserunt de cetero iure perpetuo et hereditario possidendum quicquid ipsi habebant apud Novam Villam que sita est in bosco de Beine in omnibus proventibus in tota iustitia alta et bassa in toto districto illo et in omnibus appenditiis et pertinentiis illius ville et districti excepta tamen minuta decima que pertinet ad altare illius ville Donaverunt etiam nobis et concesserunt cum premissis quicquid habebant apud villam de Rumiliaco in omnibus proventibus in tota iustitia alta et bassa in toto districto illo et in omnibus appenditiis et pertinentiis illius ville et districti Nec propter hoc absoluti sunt a solutione XXX solidorum parisiensium quos nobis debent singulis annis pro pastu Preterea dicti abbas et conventus de cetero aliquem novum hospitem in villam suam de Humblariensis recipere non possunt nec debent qui nobis debeat expeditionem vel servitium Que ut perpetue stabilitatis robur obtineant presentem paginam sigilli nostri authoritate et regii nominis caractere inferius annotato confirmavimus Actum Parisius anno Domini MCCXXIII regni nostri primo mense februario astantibus in palatio nostro quorum nomina supposita sunt et signa Dapifero nullo Signum Roberti buticularii Signum Bartholomei camerarii Signum Matthei constabularii Data per manum Garini Sylvanectensis episcopi cancellarii