Charter Document - 06000094
| Charter Number: | 06000094 |
|---|---|
| Cartulary Title: | The Cartulary and Charters of Notre-Dame of Homblières |
| Charter Language: | Latin |
| Charter Origin: | Religious |
| Charter Type(s): | Settlement |
| Date: | 1178 |
| Date type: | Internal, A.D. |
| Resource Link(s): |
|
Charter:
Ego Rainaldus Dei gratia Noviomensis episcopus notum fieri volo tam futuris quam presentibus quod cum causa que inter venerabiles fratres nostros abbatem de Ribodimonte et abbatem Humolariensem et abbatissam de Monsteriolo et Girardum de Brenort vertebatur nobis a domino papa delegata esset terminanda hinc inde rationes audire plenius et cognoscere curavimus et tandem Deo annuente querela ipsa nostro examine et concordia mediante huiusmodi finem sortita est Consilio itaque prudentium virorum et personarum honestarum que nobiscum aderant in hunc modum inter eos composuimus quod utrique parti certam partem territorii assignavimus et certas metas hinc inde apponi fecimus ita quod in parte alterius alter absque assensu alterius cuius est pars nullatenus intrare presumat et coloni in utriusque parte quod ad cultum tunc temporis reduxerant salva garba domini cuius est fundus in pace possideant De incultis autem terris vel nemoribus absque assensu domini cuius est pars ex tunc colere vel sartare non possint nec debeant Si autem contigerit quod ipsi coloni aliqua occasione terras illius territorii vendere velint aut alienare non licet eis nisi domino ipsius territorii vel absque licentia ipsius domini Quod ut ratum habeatur in posterum tam sigilli nostri impressione quam testium sub assignatione roboramus Signum Evrardi abbatis Sancti Preiecti Signum Mathei abbatis Sancti Quintini de Insula Signum Raineri abbatis Calniacensis Signum Huberti abbatis Humolariensis Signum Gaufridi cantoris Noviomensis Signum magistri Ingeranni Signum Balduini cancellarii Signum Iohannis capellani Signum Nicholai decani Signum magistri Martini Actum anno incarnationis Dominice MCLXXVIII