Charter Document - 06000092

Alexander episcopus servus servorum Dei dilectis filiis abbati et fratribus Sancti Nicholai de Ribodimonte salutem et apostolicam benedictionem Ea que compositione vel iudicio statuuntur firma debent et inconvulsa existere et ne recidivum paciantur aut malignorum valeant presumptione mutari apostolice convenit firmitatis robore communiri Sane cum olim ad presentiam nostram perlatum fuisset quod causam quam adversum vos abbas Humolariensis et abbatissa de Monasteriolo et Gerardus de Brenorch super quodam nemore habebat Hugo abbas sancti Quintini de mandato nostro sicut a vobis recepimus compositione amicabili terminasset nos causam ipsam pro eo quod nobis dubium erat an ita res se haberet venerabilibus fratribus nostris B[auduino] Noviomensi et G[altero] Laudunensi episcopis commisimus audiendam et sine debito terminandam expressius eis mandantes ut si constaret sibi prescriptam compositionem de assensu fuisse partium factam sicut in predicti abbatis de Monte Sancti Quintini scripto autentico continebatur eam facerent auctoritate apostolica firmiter observari Qui utique prout ex litteris suis accepimus partibus ante se convocatis rei veritatem studiosius inquirentes per autenticum scriptum prefati abbatis de Monte Sancti Quintini et ex testimonio plurium magnarum et honestarum personarum cognoverunt quod predicta compositio de assensu partium fuerat celebrata et ideo eam stare debere iudicaverunt et auctoritate nostra preceperunt firmiter observari Quorum siquidem litteris super hoc certificati eandem compositionem ratam et firmam habentes auctoritate apostolica confirmamus et presentis scripti patrocinio communimus statuentes ut nulli omnino hominum liceat hanc paginam nostre confirmationis infringere vel ei aliquatenus contraire Si quis autem hoc attemptare presumpserit indignationem omnipotentis Dei et beatorum Petri et Pauli apostolorum eius se noverit incursurum Datum Anagnie XV kalendas augusti