Charter Document - 06000035
| Charter Number: | 06000035 |
|---|---|
| Cartulary Title: | The Cartulary and Charters of Notre-Dame of Homblières |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1106 - 1107 |
| Date type: | Assigned |
| Resource Link(s): |
|
Charter:
In nomine sancte et individue Trinitatis Patris et Filii et Spiritus sancti Ego Werricus miles cognomento Satrapa misericordia Dei Christianus et quantum ad seculi dignitatem nobilissimis ortus natalibus considerans seculum hoc lubricum vanum et fragile diversis casuum fluctibus male agitari continuis etiam malorum incrementis paulatim deteriorari re vera autem multo melius in celo decernens quam in terra thesaurizari commodum duxi Christum potius malle sequi quam in hac valle plorationis male valle diutius peregrinari dominico etiam roboratus exemplo qui suis fidelibus in Evangelio pro terrenis centuplum in presenti insuper vitam eternam in futuro retributionem repromittit Hec omnia caduca et vana funditusque ruitura pro certo sciens fore filio meo nomine Gerardo quem habebam unicum mecum assumpto postposita seculi pompa eiusque sarcina nec mora pervenimus ad beatissime Dei genitricis Marie famosum locum cui antiquitas Humolarias indidit vocabulum illicque quidquid possidebamus indominicatum in mancipiis in ancillis in prediis in fundis in aquis in pratis in nemoribus et sylvis et in omni nostra supellectili facta solemni donatione tradidimus Deo nos metipsos mancipantes regulari vinculo Quapropter notum fieri volumus tam presentibus quam futuris idcirco hoc nostrum testamentum velle nos mandare litteris ne forte ab hodierna die et deinceps aliquis filius Belial pervertere conetur quod absit quod constat firmatum sub testibus idoneis Quod si quis amodo presumpserit in primis iram incurrat omnipotentis Dei eterneque subiaceat maledictioni centumque auri libras inferat scrinio regis et non accipiat quod iniuste repetitur quia pervertere voluit que pro remedio animarum nostrarum anchora nostre bone voluntatis stabilivit Actum est hoc in monasterio Humolariensi ante altare internerate virginis Marie per secula protectricis et nostre Domine Domino Maszelino huius loci tunc temporis venerabili abbate anno sexagesimo Philippo rege regnante dominoque Baldrico Noviomensium episcopo octavo presulatus sui anno pontificatus