Charter Document - 06000033
Charter Number: | 06000033 |
---|---|
Cartulary Title: | The Cartulary and Charters of Notre-Dame of Homblières |
Charter Language: | Latin |
Charter Origin: | Religious |
Charter Type(s): | Confirmation |
Date: | 1094 |
Date type: | Internal, A.D., Regnal |
Resource Link(s): |
|
Charter:
In nomine sancte et individue Trinitatis Patris et Filii et Spiritus sancti Ego Ioannes thesaurarius Sancti Quintini sciens ecclesie multo melius in coelo thesaurandum notum ecclesie volo presentibus notum fore et posteris quod altare de Urvillari quod iure antecessorum mei iuris erat proprietatis Deo et sancte Marie Humolariensi ac beate Hunegundi tradiderimus ob mee salutem anime perpetualiter habendum fidelibusque inibi Deo famulantibus ita et in vita sicuti et post mortem possidendum Fratres igitur ipsius loci tam presentibus meis quam Dei et ipsorum proveniente gratia me mutuo charitatis affectu complectentes Deo et mihi pro huius beneficii compensatione promiserunt se donec viverem unam cantaturos missam pro defunctis singulis septimanis et post meum ab hoc seculo discessum cum mee defunctionis dies instaret vel anniversaria recurreret mei obitus obsequium celebraturos prout est ibi agere consuetum et in ceteris locis eiusdem ordinis et religionis statuerunt et illud quod quicumque de eodem conventu sacerdos esset ipsa die vel infra octo dies in mei ipsius memoria et speciali recordatione pro cunctis in Christo fidelibus Deo misse sacrificium offeret Ordinavit etiam charitas eorum ut in die Trinitatis que ante Domini adventum quibusdam in locis celebratur die scilicet mee nativitatis quandiu viverem et in anniversaria mei transitus commemoratione refectio eorum uno quolibet generali ferculo communiter et indesinenter ampliaretur et XIII pauperes fratres in nomine meo pascendi eadem die quotannis introducerentur Si quis ergo huius mee concessionis donum subtraxerit et nulla intercedente pecunia concessum aliquo modo violare presumpserit perversor et direptor pauperum et ecclesie Christi iram sancte Trinitatis punitus incurrat et his et omnibus sanctis apud supernum iudicem questoribus cum Iuda pecunie dilapidatore sententiam et iudicium maledictionis eterne sustineat et ut hoc modernis ac futuris temporibus firmius habeatur dignum duxi testibus subtitulatis confirmare et in eorum presentia super altare positum Deo et prelibatis sanctis contradere contradendum delegare delegandum in posterum confirmare Signum eiusdem Ioannis Signum Fulconis prepositi sui Signum Roberti levite Signum Anselmi subdiaconi Ego Guido cancellarius Sancti Quintini adfui et recognovi Actum anno incarnati verbi MXCIIII indictione II epacta XII concurrente VI regnante Philippo anno XXXVI Domino Erleboldo abbate huius loci anno tertio