Charter Document - 05970016

Walterus Dei gratia Eboracensis Archiepiscopus Anglie Primas dilecto in Christo Roberto Alwino Magistro Hospitalis Beati Johannis Baptiste de Notingham et Fratribus ibidem Deo et Sancto Johanni Baptiste servientibus salutem et benedictionem Cum sit statutum inter viros religiosos ut ordo observetur cum sine ordine nulla sit religio statuimus firmiter precipientes ut quicunque sit custos vel magister Domus Sancti Johannis Baptiste de Notingham sic provideat quod ibi sint duo capellani vel plures ibidem divina celebrantes imperpetuum Insuper statuimus ut omnes fratres simul surgant ad Matutinas et ita tempestive ut Matutine possint precantari ante auroram vel in exortu aurore de festo Sancti Michelis usque ad Pascha cantatisque consequenter Prima et Tertia celebretur Missa et post Missam cantatis Sexta et Nona fratres intendant negotiis domus unusquisque prout competit officio sibi deputato et cum non prepediuntur rationabili aut necessario impedimento audiant Vesperas et Completorium Statuimus etiam ut omnes regulariter sint obedientes suo custodi vel magistro sine contradictione et murmure Nullus quoque sit proprietarius set si quis aliquid habuerit proprium resignet illud custodi vel magistro ante septem dies post hujus precepti promulgationem alioquin eodem die septimo ipso facto retentionis proprii sit excommunicatus Custos vero vel magister proprium si habeat convertat in domus utilitatem Si autem innotuerit aliquem cum proprietate obiisse corpus ejus projiciatur extra sepulturam Christianam et sepeliatur alibi projecta super eum ejus proprietate a fratribus dicentibus Pecunia tua sit tecum in perditionem Nullus habeat seratam archum nisi sit arche deputata ad suum officium Omnes vestiantur cibentur et potent de communi et non comedant carnes in ebdomada nisi tribus diebus scilicet die Dominica die Martis et die Jovis nisi per licentiam custodis Comedant simul in uno refectorio servantes in refectione silentium aut voce submissa proferatur si quid loqui compellat necessitas Omnes simul jaceant in uno dormitorio vestiti femoralibus et in camisiis vel in indumento quo utuntur in loco camisie et ad horam qua intrant in dormitorium eant cubitum usque post Primam cantatam observant silentium et de nocte non accedant fratres ubi sint sorores nec e converso nisi egritudine adveniente Casti sint omnes et sobrii nec potent alicubi in municipio vel in suburbio Moderati sint in victu bona domus et elemosinas collatas in pauperum et infirmorum necessitates fideliter convertentes Regularem gerant habitum scilicet de russeto et nigro panno Singulis ebdomadis saltem semel conveniant in capitulo et ibidem proclamentur et excessus regulariter corrigantur a custode vel a magistro teneaturque capitulum absque garrulitate et clamore et qui excesserint humiliter et obedienter subeant disciplinam canonicam Non admittantur autem plures fratres vel sorores quam necessarii sunt ad serviendum infirmis et custodiendum bona domus Familia si quam habeant sit moderata honesta sobria et casta si quis vero de familia inventus fuerit ebriosus aut luxuriosus nisi ab hujusmodi vitiis se temperaverit expellatur a servitio domus Nullus frater vagetur per villam aut alibi nisi a suo custode vel magistro sit regulariter licentiatus Compotus reddatur secundum Concilium Provinciale Istud scriptum singulis mensibus semel recitetur in capitulo in lingua Gallica vel Anglicana Sorores converse secundum quod competit suo sexui observent ea que supra statuimus a fratribus observanda In principio Matutinarum dicant laici fratres et sorores Credo in Deum et Pater Noster deinde pro Matutinis viginti et quinque Pater Noster ad Primam septem Pater Noster ad Tertiam septem Pater Noster ad Sextam septem Pater Noster ad Nonam septem Pater Noster ad Vesperas quindecim Pater Noster ad Completorium septem Pater Noster Post Completorium dicant semel Pater Noster et Credo in Deum In loco autem ubi fratres et sorores moriantur ceteri dicant infra triginta dies quinquies centum Pater Noster Tenentur etiam singuli dicere singulis septimanis pro fratribus et sororibus vivis et defunctis et pro omnibus benefactoribus dicte Domus Hospitalis Sancti Johannis Baptiste centum Pater Noster