Charter Document - 05960140

[] gaudere et presens scriptum peruenerit eternam in domino Salutem [] in melius commutantur debent assensus episcopalis auctorita[] pet[]uis temp[] rob[] []eant firmitatis eiusdem patrocinio confirmari Inde est quod nos diligentius attendentes cum quanta molestia et periculo corpora defunctorum a portesmue usque ad matricem ecclesiam de portesia tum propter uie prolixitatem tum propter uarias aeris tempestates consueuerint usque ad tempora nostra deferri diuine miseracionis intuitu ad peticionem domini Ricardi illustris regis anglorum necnon ad instanciam dilectorum filiorum nostrorum canonicorum Suwic ad quos prescripta ecclesia de portesia cum capella Sancti Thome de portesmue et aliis pertinenciis suis de tota insula portesie de iure spectare noscuntur cimiterium eiusdem capelle et duo altaria in eadem inuocata spiritus sancti gratia solempniter consecrauimus Porro de clementia dei et meritis sanctorum petri et iacobi aliorum que in quorum honore predicta altaria dedicauimus confidentes omnibus Christi fidelibus uere penitentibus et confessis qui infra octauas consecracionis eiusdem deum in sanctis suis ibidem honorare studuerint xx dies Hiis uero qui in aniuersario die utriusque altaris siue in festis quorumlibet sanctorum in quorum memoria memorata altaria consecrata esse noscuntur locum ipsum uisitauerint ei que de bonis sibi a deo collatis aliquid deuote contulerint de iniuncta sibi penitentia vii dies ad singula altaria misericorditer indulgemus facta est autem hec consecracio mea et indulgentia anno ab incarnacione domini MCXCVI in festo sancti gregorii scilicet iiii Idus marcii anno coronacionis predicti Regis Anglie vii pontificatus nostri similiter anno vii Ad maiorem quidem euidenciam posterorum ad omnium uolumus peruenire noticiam quod de predictis altaribus illud quod in latere australi habetur in honore sanctorum iacobi et iohannis fratrum et beati gregorii sanctarum que katerine et margarete Quod uero in parte septentrionali in honore sanctorum petri apostoli laurentii martiris martini et leonardi confessorum et beate marie magdal dedicauimus Ex auctoritate itaque summe et indiuidue trinitatis patris scilicet et filii et spiritus sancti et beati martiris Thome et predictorum et omnium sanctorum sub interminacione anathematis et eterne pene commutacione firmiter inhibemus ne quis istius loci per nos consecrati iura seu pacem minuat uel auferat aut disturbet Cunctis uero loco sepe dicto debitam reuerentiam seruantibus et honorem sit pax et honor in Christo ihesu et uita eterna Amen