Charter Document - 05950096
| Charter Number: | 05950096 |
|---|---|
| Cartulary Title: | Abingdon Abbey Charters |
| Charter Language: | Latin |
| Charter Origin: | Royal |
| Charter Type(s): | Gift |
| Date: | 1110 |
| Date type: | Assigned |
| Resource Link(s): |
British Library - Cotton MS Claudius C IX (f148r) |
Charter:
Ad exitum burgi Abbendonensis pons quo transitur cum fluuius Eoche exundat habetur iuxta quem australi in parte situm est molendinum ab incolis Einore appellatum regio per id tempus fisco deditum Huius molendinarius prata in uicino posita que abbatie iuris erant summergebat aque etiam ductum quamdiu poterat ne molendinum abbatis inferius positum moleret sepe recludebat Quare cum ob istiusmodi insolentiam frequenter notaretur nec ideo ab hac proteruitate descisceret abbas inde remedium et futurum posteris loci Abbendonensis hac de causa prouectum multum utile et durabile acquisiuit Nam plurimorum industria uirorum et precipue Hugonis de Bochelanda suo pro beneficio comitante sibi suffragio adeo apud regis gratiam institit ut dominatum ipsius molendini perpetuo ipse et ecclesia Abbendonensis ea libertate qua hactenus constiterat potiretur Quo percelebrato illud idem molendinum usibus elemosinarii monasterii pro pauperum sustentatione delegauit Cuius rei testes sunt apices ea tempestate regis ad comitatum Berchescire directe quarum iste extitit textus