Charter Document - 05950069
| Charter Number: | 05950069 |
|---|---|
| Cartulary Title: | Abingdon Abbey Charters |
| Charter Language: | Latin |
| Charter Origin: | Royal |
| Charter Type(s): | Gift |
| Date: | 1106 |
| Date type: | Assigned |
| Resource Link(s): |
British Library - Cotton MS Claudius C IX (f153v) |
Charter:
Rege in Normannia degente Mathildis regina mensis Augusti diebus per Abbendoniam transiens imminente solempni die Assumptionis Celi Regine illuc suum ea de causa iter deflexit Sacris itaque misteriis pro tanti festi competentia annisu celebratis abbate uero Faritio ut tantam decuerat hospitam quam in his exceperat affabiliter et ubertim in officiis sese exhibente humanitatis regina eadem abbatis exoratu Robertum quendam filium Heruei in uicino calcete Colebrocensis degentem cum tota ipsius terra quam tunc tenebat sancte Marie in loco Abbendonensi perpetue dominationi contulit domino eiusdem uiri id fieri concedente simili quidem uocabulo Roberto scilicet sed cognomine diuerso id est Gernone subinferentibus illius filiis idem sibi ualde placuisse Aluredo uidelicet et Mathathia cum nepotibus Goisfredo Fulcone et Pagano Preterea ad hoc et curtillagium adiectum est terre predicti Roberti in quo commanebat Rannulfus eiusdem Roberti germanus non ab inuicem ipsi longe dispositi mansionibus Et quidem ipsa regine donatio ecclesie impendi ualde erat necessaria Nam iter quod ad urbem Lundoniam ab Abbendonia porrectum est pro milium numerositate interpositorum itinerantibus laboriosum peragi uidebatur siquidem deerat propria mansio ubi apte hospitari potuisset huius itineris in medio Locus autem predictus quindecim miliariis ab urbe Lundonia distans hospitandi non minimam prebet oportunitatem cum sit illic siluarum pratorum mercimoniorumque copia De hac itaque regine donatione eiusdem littere ad comprouinciales publicarum administrationum exactores directe fuere hunc modum continentes