Charter Document - 05950067

Adhuc ad posterorum cautelam quiddam de eodem loco dignum putauimus subnectendum Quidam cupide mentis homines illius terre portione frui nitebantur Quod cuidam plurimum callenti ingenio actitandum commisere cui nomen Benedictus qui causis comitis consulendis sepius interesse solebat Ille dum promitteret quod ad finem propositum eorum uti rebatur deduceret in spe arrecti expectabant rei exitum Machinari itaque cepit ut primo insueta a loco exigerentur deinde cum exacta non redderentur queque illic reperta forent abducerentur Et hec quidem abbatis Faritii post obitum contigerunt Talia itaque cum sepius ingererentur eorum qui publicam monasterii rem gubernabant consultu comitis ad curiam unus de ecclesie seruientibus mittitur [cui] carta secum ferenda assignatur ipsiusque comitis auctoritatem libertatis totius de illa terra exactionis protestatur Legatus ergo itinere confecto curiam adire sibi imperatam intrat coram arbitrum maioribus de causa sibi dicendi imposita conqueritur cartam libertatis pro attestatione rerum dictarum ad medium effert Aderat is de quo supra intulimus dictorum et responsorum finem opperiens Iamque communi in audientia litteris recitatis rogat ille sibi easdem porrigi parumper adhuc percepturus earum intellectum Quibus porrectis sinum mox in suum inuoluit Quo brevi gerulus uiso miratus factum stupidus primo hesit Tum deinde cum repeteret porrectum nil ab eodem inuasore rehabuit nisi risum At assidentes quibus iustum placebat pro hoc indignari alii uero ad contrarium illecti cachinnari Ita infecto negotio legatus ille cum tali detrimento domum reuertitur labore tristiciaque confectus Dei autem miseratio hanc ipsam fortunam et si ad tempus quidem aliquantisper contrariam postmodum tamen uertit in prosperam Illum itaque Benedictum predictum dignatio diuina priuat amicitia comitis huncque expellit qui sic quandoque latorem scripti fefellit uellet nolletue relicti Pressus uero sub fasce ruine ultio diuina penas eidem ingessit Monachique deum precibus stimulantes scripta que pridem perdiderant receperunt Caueant ergo omnes periuri fraudes caueantque tali legato mittere breue fraudis amico