Charter Document - 05950060
| Charter Number: | 05950060 |
|---|---|
| Cartulary Title: | Abingdon Abbey Charters |
| Charter Language: | Latin |
| Charter Origin: | Royal |
| Charter Type(s): | Confirmation |
| Date: | 1100 - 1106 |
| Date type: | Assigned |
| Resource Link(s): |
British Library - Cotton MS Claudius C IX (f148v) |
Charter:
His diebus nobiliorum quidam militum de Nigelli de Oilli feudo tenentium Droco nomine egritudine captus monasterium ad hoc sese contulit et religionis habitum abbate Faritio tribuente illic induit et ipse quamdiu superuixit infra claustri septa deguit Qui ut eius inter benefactorum monasterii specialius apud posteros haberetur memoria suis de possessionibus aliquid beneficii inibi curauit conferre Dedit itaque fratrum usibus unam hidam in loco qui dicitur Wdamundaslea de uilla Westuna liberam quidem et quietam omnium quarumlibet questionum uel geldorum uel militaris exactionis quanquam ad ipsam diuerse dominationes diuerso respectu intenderent Siquidem feudi comitis Cestrensis deputatur de quo tunc temporis Nigellus de Oilli eandem hidam simul cum nonnullis aliis possessionibus et per Nigellum Droco tenebat Sed Drocone monachatum subeunte Rogerus filius Radulfi filiam ipsius in coniugium ducens quarumlibet ille rerum potiebatur dum seculo militaret summam ipse adipiscitur Qui quoniam ingenio callebat Nigelli de Oilli consensum sibi traduxit quatinus de comite in capite [ut uulgo loquatur] teneret homo ipse comitis effectus Dum ergo Nigelli iuris predicta terra fuisset quicquid Droco de ea disposuit libenter fieri annuit hocque modo suis litteris auctorizauit []