Charter Document - 05940027

In nomine sancte et indiuidue trinitatis Lotharius diuina propitiante clementia Francorum rex Si iustis et rationabilibus seruorum Dei petitionibus aurem clementie impendimus procul dubio exinde eternam a Domino mercedem nos recepturos speramus Quapropter uniuersis sancte Dei ecclesia fidelibus tam presentibus quam futuris notum fieri uolumus quod adeuntes regie celsitudinis nostre presentiam dilectissima scilicet nobis coniunx nostra regina nomine Emma simul etiam Adalbero sancte Laudunensis ecclesia necnon et Gibuinus Katalaunensis sedis antistites reuerendi intimauerunt nobis qualiter Heribertus comes palatii nostri nobis karus et fidelis in omnibus ad locum Sancti Petri Deruensis cenobii ubi Sanctus martir Bercharius corpore requiescit humiliter uenisset et quoddam sui iuris allodium quod a progenitoribus suis illi contigerat pro remedio anime sue eiusdem loci fratribus ad supplementum uini inopie quo idem fratres maxime indigere uidebantur deuote tradidisset insuper etiam ad notitiam posterorum sueque traditionis firmitatem cartam exinde et uestituram sub presentia plurimorum secundum morem legalem supradicto loco publice perfecisset Igitur huius rei gratia predicti pontifices interueniente quoque prefata regina karissima nobis nostra coniuge petitionem supradicti comitis Heriberti unanimiter nobis inferentes clementie nostre pariter suggesserunt ut hanc eius traditionem quam ipse Deo et Sancto Petro ob salutem sui fecerat nos precepti nostri auctoritate premuniremus Adiacet uero alodum in pago Otminse intra fines uille que Velcianas dicitur notis ac legitimis terminis prefixum supra uidelicet et infra illius aque decursum ubi Vetus Materna nominatur illi scilicet alodo equa pene portione coniunctum atque conterminum quod in eadem uilla predicti monachi ab antique possidere uidebantur Nos itaque celesti beneficio promoti horum principum nostrorum precibus aurem benigne accomodantes ut eosdem Dei seruos pro salute nostra necnon et dilecte coniugis ac prole nostra simulque statu regni nostri copiosius diuinam maiestatem exorare delectet decernimus atque constituimus ut supradictum predium ab eodem Heriberto fideli nostro comite traditum absque ullius contradictione persone legitimo et quieto iure cum uineis siluis pratis aquis aquarumque decursibus terris cultis et incultis exitibus et regressibus in perpetuum possideant et quicquid exinde facere uoluerint liberam et quietam in omnibus habeant facultatem ea uidelicet lege a nobis interposita ut si quis contradictor existat hanc multam sustineat ut centum auri libras regio fisco nostro primitus inferat et quod temeraria presumptione conqueritur penitus obtinere non ualeat Vt autem nostre auctoritatis decretum per succedentia tempora contra omnia obstacula inuiolabile permaneat manu nostra ac fidelium nostrorum tam episcoporum quam procerum Francorum corroborari ac anuli nostri impressione subter iussimus insigniri Signum domni Lotharii gloriosissimi regis Arnulfus notarius ad uicem Adalberonis Remorum archiepiscopi recognouit Actum Lauduno Clauato anno dominice incarnationis DCCCCLXXX regnante domno Lothario anno xxvii feliciter