Charter Document - 05940024

In nomine sancte et indiuidue trinitatis Heribertus gloriosus Francorum comes Notum sit uniuersis sancte Dei ecclesia fldelibus tam presentibus quam etiam et futuris quoniam Adso abba et ceteri fratres ex monasterio Sancti Petri et Beati Bercharii martiris preciosi in saltu Deruensi constituti ubi ipse gloriosus martir et Sancta Theodosia corpore requiescunt ante presentiam nostram uenerunt et causas sue necessitatis humiliter intimauerunt reclamationem facientes de mercato scilicet et pontanatico de uilla que uocatur Olumna dicentes uidelicet ab antecedentibus Francorum principibus Karolo imperatore augusto et Bosone quondam eiusdem Karoli imperatoris conspalatio per regale preceptum Sancto Petro et Sancto Berchario fuisse concessum Vnde et ipsius regalis precepti auctoritatem presentialiter michi ostenderunt in quo supradicti mercati et pontanatici traditio continebatur Simul etiam hoc rationabiliter demonstrauerunt quod hec res que ab anterioribus regibus supradicto loco concessa fuerat per incuriam et neglegentium temporum succedentium ab eo loco fuisset abstracta Quam rem nos diligenter considerantes simul et de salute nostra sollicite cogitantes in primis pro Dei amore et Beati Petri apostolorum principis necnon et pro remedio anime nostre petitioni eorum libenter adsensum dedimus et illud mercatum quod petebant cum pontanatico et salniuo Sancto Petro et fratribus reddidimus ita ut idem fratres medietatem in mercati districtione et pontanatici acceptione possideant et nos aliam medietatem in diebus nostris teneamus Et hoc eo tenore facimus ut quandiu uiuimus Domini misericordiam studeant exorare et post discessum nostrum memoriam nostri faciant et anniuersarium nostrum celebrare non negligant Si quis autem aut nos ipsi aut aliquis successorum nostrorum hanc nostre elemosine largitatem iniqua presumptione temerare aut uiolare uoluerit inprimitus iram Dei omnipotentis incurrat insuper et fisco regie quinquaginta librarum mulctam inferat et quod repetit euindicare non ualeat Sed hec traditio nostra firma et inconuulsa permaneat constipulatione subnixa S domni Heriberti gloriosi comitis qui hoc testamentum fieri rogauit et confirmauit S Adsonis comitis S Rodulfi S Teoderici S Richardi S Lantberti Data xvi kalendas Februarii anno xiiii regnante domno Lothario rege Francorum Actum monasterio Deruo publice