Charter Document - 05940011

In nomine Domini Dei et saluatoris nostri Ihesu Christi Lucdouuicus diuina ordinante prouidentia imperator augustus Si locum quo olim monasticus ordo uiguerat in edificiis releuari et eamdem uitam monasticam reformari facimus et liberalitatis nostre munere de beneficiis a Deo nobis conlatis eidem loco unde serui Dei inibi consistentes in hanc mortalem uitam aliquod subsidium habere ualeant aliquid conferimus id nobis et ad hanc transitoriam uitam feliciter peragendam et ad eternam perpetualiter optinendam profuturum liquido credimus Idcirco nosse uolumus omnium fidelium nostrorum tam presentium quam et futurorum industria qualiter Haudo uenerabilis abba monasterii cuius uocabulum est Ders quod constat esse constructum in pago Pertense super fluuium Viera et quod olim uocabatur Puteolus et dicatum in honore Sancti Petri principis apostolorum ac Sancti Bercharii cuius corpus ibidem requiescit quique idem ipsum monasterium a nouo opere construxerat et monachos sub regula Sancti Benedicti uitam degentes collocauerat nostram adiens serenitatem innotuit mansuetudini nostre quod eadem monastica uita penitus in eodem loco abolita esset et in canonicum ordinem transierat Petiitque ac supplici postulatione deprecatus est ut nostra auctoritate eandem monasticam uitam reformari et habitacula ad hanc uitam congrua reficiendo aptari permitteremus Cui sicut dignum erat gratias egimus et ea que deprecabatur ei fieri permisimus Insuper et ut hoc quod idem ipse deprecabatur melius peragere et serui Dei qui inibi degere constituti et constituendi erant aliquod subsidium ex nostra largitione habentes libentius Deo seruire potuissent complacuit nobis pro mercedis nostre augmento et eterne retributionis fructu quasdam res nostre proprietatis sitas in comitatu Breonense id est uillam ac beneficium illud cuius uocabulum est Dodiniaca curtis habentem mansos duodecim quam hactenus uuassallus noster nomine Hisimbertus nostra largitione in beneficium habuisse dinoscitur cum omni integritate id est cum mancipiis utriusque sexus cum domibus edificiis ecclesiis terris cultis et incultis siluolis pratis pascuis aquis aquarumue decursibus molendino uel quicquid ad denominatam uillam iuste et legaliter pertinere dinoscitur et nostri iuris ac possessionis in re proprietatis est totum et ad integrum per hoc nostre auctoritatis conscriptum ad antedictum monasterium quod sicut diximus Ders nuncupatur sollempniter delegare ea uidelicet conditione ut a prelatis et monachis Deo inibi militantibus perpetua possessione teneatur ac possideatur Et ut hec nostram concessionis ac largitionis auctoritas inconuulsam et inuiolabilem obtineat firmitatem manu propria nostra subter eam firmauimus et anuli nostri impressione adsignari iussimus Signum Lucdouuici serenissimi imperatoris Data xiiii kalendas Martii anno Christo propicio xviiii imperil domni Lucdouuici piissimi augusti indictione x Actum Aquisgrani palatio regio in Dei nomine feliciter amen