Charter Document - 05930051
| Charter Number: | 05930051 |
|---|---|
| Cartulary Title: | The Cartulary of Flavigny, 717-1113 |
| Charter Language: | Latin |
| Charter Origin: | Royal |
| Charter Type(s): | Grant |
| Date: | 1018 |
| Date type: | Internal, A.D., Calendar, Regnal |
| Resource Link(s): |
|
Charter:
In nomine summe trinitatis et indiuidue unitatis Ego Rotbertus gratia et benignitate redemptoris Iesu Francorum rex notum fieri uolumus industrie omnium sancte matris ecclesie tam presentis quam future etatis fidelium quod quidam Amadeus abbas Flauiniacensis coenobii in honore Beati Petri apostolorum principis almique Preiecti martiris ac presulis fundati ad nostram presentiam accesserit petens quandam capellam nostri iuris infra moenia Aeduorum ciuitatis sitam et in honore Beati Iohannis euangeliste dicatam supradicto loco scilicet Flauiniaco dari que fratribus predicti loci ita erat necessaria ut ospitandi causa eis esset expetenda Cuius petitio nec uisa est refragabilis nec iniusta Si enim omnibus rationabilibus est fauendum petitionibus quanto magis illorum quorum remuneratio in die iustitie constat copiosior Vnde quoniam huic simile multotiens ab antecessoribus nostris frequentatum audiuimus et factitatum libenter petitionis illius prebuimus effectum quatinus locus sepenominatus Flauiniacus uidelicet et monachi ibi degentes atque inibi diuine maiestati famulantes pretexatam capellam in honore Sancti Iohannis euangeliste ut diximus consecratam cum omnibus que ad ipsam pertinere uidentur perpetualiter nullo inquietante deinceps possiderent Et ut firmiorem amodo tenendi haberent astipulationem hoc scriptum inde eis fieri iussimus et sigilli nostri impressione insigniri precepimus Actum Aedue anno dominice incarnationis Millesimo XVIII indictione prima regni uero gloriosissimi regis Rotberti xxx iii kalendas Martiis Ego in nomine Christi Galterius cathedre Augustudunensis urbis indignus episcopus assensi et propria manu firmaui S Hugonis episcopi Ego in nomine ligni crucis Balduinus sancti sedis Tharoensis antistes adstipulaui Ego Teodericus Aurelianensis ciuitatis episcopus manu propria corroboraui Ego Rotbertus dux Burgundiorum propria manu firmaui