Charter Document - 05930025

Anno DCCCXCIIII indictione xii inuidie instinctu malorum ortatu abortata est infamis fama Flauiniaco monasterio et castro publico in quemdam loci illius Ieuitam et monachum Gyrfredum officio prelationis functum quod piissimum patrem et reuerendum presulem domnum Adalgarium Eduorum episcopum letali extinxerit ueneficio Huius criminis iniquissimum obiectum Deo simul et hominibus horrendum nonmodo ipsius ecclesie uerum etiam totius Gallie aures pulsauit et infami satis elogio notauit Prefatus uero leuita et monachus super illatione tanti facinoris nimium exhorruit utpote qui tanta tamque preualida ab ipso dulcissimo patre persenserat beneficia uti omnibus satis abundeque claret super quo primitus consilium gloriosi presulis domni Gualonis ipsius successores expetiit seque a tam nefandissimo scelere non minus cogitatu quam facto presentie illius Deo teste et iudice omnium ac inspectore cordium immunem firmauit Denique tantus tamque precelsus pontifex diuinorum necnon et humanorum scitus filiorum ecclesie consilio fultus ouem sibi creditam perire noluit sed insuper fomenta adornationum et medicamina diuinorum eloquiorum pie et misericorditer adhibuit ut si forte diaboli pellatia quid simile cordi illius iniecerat saltem suggestione Spiritus Sancti et infusione ipsius uerbi ecclesiastica institutione professus salubriter curari posset et ablui Verum iam dictus leuita et monachus in nullo penitus tanti flagicii conscius iudicium sibi Sancti Spiritus proposuit et se ad quodcumque examen ecclesiastico more censeretur modis omnibus promptissime deliberauit Quocirca prenominatus presul tantum et tam inauditum facinus proprio cunctatus deliberare iudicio ad sanctam et comprouincialem synodum Aureliani nominandi archiepiscopi et ceterorum coepiscoporum presentia discutiendum et diffinendum censuit Quod et ipse ut pote immunis haud quaquam distulit Proinde Deo propitio prefixo kalendarum Maiarum die conuenere sacri pontifices Aurelianus primas totius Gallie cum illustrissimis Gualone Eduensi Ardrado Cabillonensi Geraldo Matisconensi coepiscopis simul et legatis memorandi Teutbaldi Lingonensis episcopi apud Cabillonensem urbem in ecclesia Beati Precursoris Christi Iohannis que est in prospectu eiusdem urbis ubi instituta sanctorum patrum canonice et regulariter promulgantes et ecclesiastica negotia diligentius pertractantes infamia notatum crebro dictum monachum coram positum subtili indagine et multo examine discutere laborarunt Quo isdem monachus omni iudicio et more ecclesiastico et humani iuris experimento instructus nec huius infamie euidentem accusatorem nec alicuius certitudinis pro clamatorem repperire potuit Quod tertio sub testificatione Sancti Spiritus clamari iubentes et nichil prorsus uerisimile repperientes sanciuerunt communi consilio ut quia nec conuinctum nec etiam confessum experiebantur tamen quia uentilatum et usque locorum erat diuulgatum ut ab omni suspitione liberrimus redderetur in uiciniori synodo quam omni reuerentia dignus Gualo antistes erga filios ecclesie celebraret corporis Christi et sanguinis illo examine quod solum uerius probatur et terribilius immo salubrius creditur a flagitio diuulgato publice expiaretur eo scilicet tenore eundem prius testificantes ut si in aliquo conscius tanti piaculi foret nullo modo ad sacra sumenda accederet et si forte temerarie presumeret censura Sancti Spiritus et auctoritate apostolorum principis ab ipso uiuifico redemptionis nostre pretio extorris fieret et cum Iuda Domini proditore damnatus eternis inre mediabiliter suppliciis addiceretur Sin uero inmunem se esse per omnia pernosceret fisus misericordie Dei tanti muneris donum ad salutis sue remedium saluberrime percipere non diffideret Quod omnibus usqueque satis fuit Inde igitur pastor piissimus misericordia motus illius causa apud Flauiniacum coenobium et castrum publicum sanctam synodum proprie ecclesie colligens iuxta statuta supradictorum antestitum missarum sollempniis deductis omnibus in unum qui adfuere in primore ecclesia Sancti Petri collectis iam suprafatum premonuit uirum ut sicut sibi ipsi conscientia dictaret ad sacra sumenda aut etiam refugienda quoquo uellet modo se ipsum prefigeret Quique in nullo hesitans Deum sibi et ipsum quod percepturus erat redemptionis pretium in testimonium et iudicium inuocans fidissime omnibus in prospectu positis queque supra fuerant prefixa uotis omnibus peregit Hoc igitur tanto donatus munere ne unquam ulterius tam emuloso sauciaretur uulnere hoc scriptum a prefato seniore et subter notatis suis coeuis petiit relegendum et manibus corroborandum Valo humilis sancte Eduensis ecclesie episcopus relegi et subscripsi Ardradus humilis Cauillonensis ecclesie episcopus subscripsi Geraldus rector et humilis episcopus sancti Matisconensis subscripsi