Charter Document - 05930016
| Charter Number: | 05930016 |
|---|---|
| Cartulary Title: | The Cartulary of Flavigny, 717-1113 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 0966 |
| Date type: | Internal, Calendar, Regnal |
| Resource Link(s): |
|
Charter:
In nomine summe et indiuidue trinitatis ac uiuifice deitatis Ego Achardus alme Lingonensis ecclesie pastor eximus notum fore cupio omnibus presertim ecclesie nostre filiis et fidelibus quia dum in gremio matris ecclesie nobis a Christo conlate diebus sancte sinodi sinceriter residere et pro uirium nostrarum qualitate negocia eiusdem ecclesie quatinus Christo aminiculante una cum consilio et oratu nostrorum fidelium utrorumque scilicet ordinum ad meliora proueherent ordinabiliter inuestigando perquirerem et rationabiliter tractando inuestigarem Inter plura que tunc temporis inibi Deo authore decernendo stabiliuimus et statuendo decreuimus ecce adierunt serenitatis nostre optutus quidam nostri fideles Agano miles inclitus et archipresbiter noster Simeon humiliter nostram efflagitantes dignitatem et flexis poplitibus nostram exposcentes mansuetudinem ut altare Sancti Martini cum decimis sibi aspicientibus quod est situm in comitatu Tornetrinse et in uilla Chichiuiaco constructum quibusdam monachis Sancti Petri Flauiniacensis cenobii uidelicet prelato eiusdem cenobii Adraldo et ipsius nepoti Miloni ex quorum uidetur esse prouidentia per testamentum nostre largicionis pie et misericorditer conferre et iusto moderamine condonare non dedignemur Nos uero eorum utillimam efflagitacionem deuota mente suscipientes et aures nostre celsitudinis illorum obsecrationi adclinantes desiderium illorum ad perfectum ducere maluimus consentientes prelibatis monachis Adraldo et Miloni supra inserte ecclesie altare nostris clericorum ac laicorum fauentibus fidelibus ea auctoritate ut predictum altare cum suis decimis subiectum sit perpetualiter predicto coenobio Sancti Petri Flauiniacensis Ipsi uero monachi Adraldus et Milo quamdiu eis uita superstes fuerit usum fructuarium ex eo percipiant ipsamque ecclesiam instruere et in diuinis cultibus erigere studeant nostrum quoque memoriale et omnium sancte Lingonensis successorum memoriam opportuna cum oratione agere non pigeant debitumque synodale quod ecclesie Sancti Mammetis debetur paratam uidelicet et eulogias nobis nostrisque successoribus statutis temporibus persoluere non tardant Statuimus ergo ut post finem illorum migrationis ipsum altare sine tenus et perpetualiter subiectum predicto cenobio maneat et fratres eiusdem loci summa cum stabilitate illud teneant et nostrum memoriale et successorum nostrorum sicut supra exaratum est agere non tardant saluo Sancti Mammetis obsequio Denique in Deum et propter Deum contestamur et anathematis uinculo alligamus huius paginule instituta corrumpentem aut uiolare cupientem Vt hoc donum nostre largitionis firmior et securior perseueret et hanc institutionem nostris manibus et omnium clericorum ac laicorum corroborationibus stabilitam sancta synodus recognoscat Signum Achardi episcopi S Milonis abbatis S Beraldi prepositus S Godselmi archidiaconi S Arnaldi decani S Theudonis archidiaconi S Eirmanii S Simeoni diaconi S Vgonis S Guidonis S Alectorii S Vuidrici S Ingeluami S Stephani presbiteri S Aymonis S Ayrardi S Framerui archipresbiteri S Aldefredi S Ego Bruno episcopus precatu domni Amadei abbatis relegi et laudaui Lambertus prepositus S Ego in Dei nomine Lambertus quamuis indignus episcopus postea subscripsi Ayrardus archidiaconus Tunc postea Hugo episcopus hoc scriptum relegit et confirmauit Ego Vuilencus leuita indignus ad uicem Raherii archicancellarii hanc scripturam scripsi et dataui vi Idus Aprilis regnante Lothario rege anno xii