Charter Document - 05920060

Robertus Dei gratia Episcopus Sarum dilectis in Christo filiabus Ele eadem gratia Abbatisse et Conventui Monialium de Lacock salutem gratiam et benedictionem Cum juxta merita deceat premia dispensare non est gerendum graviter aut indigne si clarioribus virtutum radiis coruscantes suis hoc meritis quasi ex debito vendicantibus in optinendis graciis ceteris preferantur ut dum bene meritos congruis premiis alii conspiciunt muneratos ad bene merendum emulacione laudabili forcius animentur Cum igitur tu filia Abbatissa dum olim inter seculi nobiles dignitate seculari fulgeres eo tibi qui ubi vult spiritu spirat desuper inspirante patrimonium tuum Domino dedicans illud quibusdam monasteriis que in eodem ut cultum divinum ampliares de novo fundasti de salute propria cogitans provide duxeris applicandum ac postmodum tua teque salubriter abnegans habitu religionis suscepto ea que prius te gracia prosequente adeo virtutum profeceris incrementis quod meritis tuis exigentibus auctoritate et assensu quorum interfuit in hac parte disponente Domino in primam predicti Monasterii Abbatissam assumpta gregis tui numerum ac hospitalitatis graciam tui regiminis tempore laudabiliter duxeris ampliandos quare possessiones predicti monasterii que nunc sunt expensarum eidem incumbentium honera nequeunt sustinere nos ob vite mundiciam et religionis fervorem que in novella monasterii vestri plantacione florere cognovimus ac meritorum tuorum optentu quo magis in vobis unitatis interioris federa sinceriori caritate solidentur ac hospitalitatis munera liberalius et libentius exhibeantur capituli nostri Sarum accedente assensu de Ecclesia de Wynterborn Sirreveton vestri patronatus taliter duximus ordinandum videlicet quod Hosberto nunc Rectore ejusdem cedente vel decedente decima garbarum tocius parrochie ejusdem pratum dominicum et mansus capitalis Ecclesie predicte quem tamen Vicarius ejusdem precario tenebit donec in alio manso competenti eidem provideritis in usus vestros proprios et perpetuos cedere debeant in futurum Residuo fructuum Ecclesie memorate ad perpetuum ipsius Vicarium pro tempore futurum qui extraordinariis oneribus inter vos et ipsum pro rata porcionum vestrarum parciendis onera ordinaria eidem incumbentia sustinebit nomine perpetue vicarie spectaturo in qua nobis et successoribus nostris de assensu vestro jus patronatus reservamus Interim vero duas marcas annuas a prefato Rectore in beati Michelis et resurrectionis Dominice festis pro equalibus porcionibus percipiendas de ejusdem Rectoris assensu Ecclesie ipsius pensionis nomine vobis duximus constituendas Ut autem hec donacio nostra perpetue firmitatis robur optineat presens scriptum tam sigillo capituli nostri Sarum quam nostro fecimus consignari Hiis testibus Domino Roberto decano Sarum magistro Rogero precentore magistro Radulfo cancellario domino Henrico thesaurario Sarum magistris Egidio archidiacono Berksire et Stephano archidiacono Sarum magistris Raddulfo de Eboraco Thoma de la Wile Waltero de la Wile Petro de Cumbe Galfrido de Bedeford canonicis Sarum magistro Ricardo de Bienham Petro de Wynborn capellano magistro Rogero de la Grene Roberto de Wychampton et aliis Dat v kal Januarii pontificatus nostri anno tertiodecimo