Charter Document - 05920009
| Charter Number: | 05920009 |
|---|---|
| Cartulary Title: | Annals and Antiquities of Lacock Abbey |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1229 |
| Date type: | Internal, A.D., Calendar |
| Resource Link(s): |
|
Charter:
Convenit inter dominam Comitissam Sarum requirentem assensum Johannis Rectoris Ecclesie de Lacock ad edificandam Abbathiam monialium in parochia sua de Lacok ex una parte et eundem Johannem Rectorem ex altera videlicet quod dicta Ela Comitissa ut predictum ipsius propositum ingressum pacificum penitus et progressum perpetuo sortiretur obligavit se et heredes suos per presens scriptum de omnimoda indemnitate dicte Ecclesie de Lacok imperpetuum conservanda tam in decimis majoribus et minoribus quarumcunque rerum secundum quod debentur a laicis decimari quam in sepulturis mortuorum et in obventionibus et legatis et in aliis quibuscumque proventibus jure pastorali ad Ecclesiam pertinentibus memoratam non obstante aliquo privilegio generali vel speciali impetrato vel in posterum impetrando Ita tamen quod liceat libere familie Abbatisse predicte quocumque voluerint alibi sive in vita sive in morte ecclesiastica percipere sacramenta et oblationes facere et legata Capellani vero qui in Abbathia jam dicta divina pro tempore celebrabunt Rectori prefate Ecclesie Parochialis fidelitatem jurabunt de indempnitate ejusdem Ecclesie conservanda et cum fuerit ibi Abbatissa disponente Domino constituta ipsa et ejus conventus per cartam suam cavebunt de indempnitate omnimoda dicte matricis Ecclesie conservanda sicut predictum est Et hoc faciet queque Abbatissa post aliam Quod si forte actis ibi aliquibus indiscrete limam correctionis apponere sit necesse dicta Comitissa dictam domum jurisdictioni Episcopi et Capituli Sarum subjecit ac ejusdem excessus commisit eisdem appellatione postposita corrigendos Ut autem ista conventio robur optineat perpetue firmitatis confectum est inter prefatos Comitissam et Rectorem presens Cyrographum bipartitum cujus partes hinc inde acceptate et sigillis eorum signate remaneant penes ipsos in istius conventionis perpetuum argumentum Actum apud Saresburiam in presentia domini Roberti Sarisburiensis Episcopi Domini Walteri Decani Rogeri Precentoris Roberti Cancellarii Edmundi Thesaurarii tertio nonas Aprilis anno gratie MCCXX Nono
Source (click image below to view full size)
