Charter Document - 05870044

Reverendo patri et domino A Dei gratia summo Pontifici B Exoniensis ecclesie minister humilis et devoti filii sui de Burgo et Eboracensis Abbates salutem et debite subjectionis obedientiam Ad ventilandam causam que inter Abbatem Sancti Albani et Priorem Dunelmensem super ecclesia de Tynemuthe verteretur juxta sanctitatis vestre mandatum die partibus prefixo in unum pariter convenimus Illo die in presentia nostra comparuit Prior Dunelmensis lectisque literis vestris coram multitudinem religiosorum virorum et clericorum ut in illa procederemus instanter postulabat asserens Dunelmensem ecclesiam temporibus plurium advocatorum episcoporum et auctoritate dius pacifice et quiete ecclesiam de Tinemuthe possedisse sed demum per secularem potestatem et laicorum violentia monachos Dunelmenses violenter ejectos fuisse et eorundem laicorum violentia sine episcopali auctoritate Sancti Albani monachos fuisse intrusos Sue autem ejectionis et aliorum intrusionis auctorem fuisse predictus Prior dicebat Robertum de Mubrai comitem Norhanhumbrie qui successerat quibusdam aliis Comitibus quorum largitionem asserebat Dunelmensem ecclesiam prefatam ecclesiam de Tinemuthe adeptam fuisse Ad hujus rei assertionem proposuit duo autentica scripta in quorum altero Waldevus quondam Comes Norhamhimbrorum qui tertius fuit ante predictum Robertum de Mubrai protestatus est se dedisse et scripti sui munimine confirmasse beato Cuthberto et monachis Dunelmi ecclesiam de Tinemuthe cum omnibus que tempore facte confirmationis habebat et postmodo erat habitura Hec autem donatio et confirmatio ut in illa autentica carta continebatur facta fuit in ecclesia Dunelmensi Walchero ejusdem ecclesie episcopo g[e]n[eralem] sinodum celebrante et eos perpetuo anathemate condemnante qui unquam ullo tempore predictam ecclesiam de Tinemuthe ab ecclesia Dunelmensi alienare presument Alterum autenticum scriptum fuit Willielmi quondam Dunelmensis episcopi successoris prenominati Walcheri in quo comprehensum fuit eundem Willelmum concessisse et carta sua confirmasse donationem ecclesie de Tinemuthe quam Walthevus comes monachis in Dunelmensi ecclesia Deo et beato Cuthberto perpetuo servituris fecit sua [] perpetuo anathemate condemnavit omnes illos qui ecclesiam de Tinemuthe ecclesie Dunelmensi auferre quando temptarent His auditis allegabat pars Prioris [] illa instrumenta publica esse et per se sufficere ad fidem notis de possessione facienda Et ut nos certiores redderet producebat quosdam clericos et laicos viros etatis magne natos quos dicebat vidisse monachos Dunelmenses ecclesiam de Tynemuthe pacifice possedisse et presentes fuisse ubi illi violenter expulsi fuerunt et monachi Sancti Albani per laicalem potestatem violenter intrusi Et quoniam senes erant et valetudinarii et alia vice sine magna difficultate asserebat eos non posse produci rogabat nos attentius ut ab eis veritatem erueremus ne morte eorum vel absentia causa ejus aliquod detrimentum pateretur His itaque completis quidem monachi et clericis qui ab Abbate Sancti Albani missi fuerant literas Abbatis nobis porrexerunt protestantes eum gravi infirmitate fuisse detentum et ideo se presentiam suam exhibere non posse Sed Prior Dunelmensis dicebat dimidium anni fere effluxisse postquam citatio facta fuerat et se ex tanta mora fuisse gravatum licet nos diem illum de consensu partium prefixissemus et nunc igitur quia causa illa civilis erat et per procuratores agi poterat presertim [] ab illo gravamine de justicia Romane sedis ut dicebat plenius confidens audientiam vestram ad festum Sancti Hillarii terminum prefigens appellavit Nos autem quoniam appell[] causam illam ad vestre discretionis examen remittendam esse censuimus Valeat sanctitas vestra