Charter Document - 05850033

A noblez gentz et sages l'abbe de Byland et le covent du mesme le lieu Thomas de Neuton saluz en Dieu Par ce s[achez] qe ie ay done et grante et par moun escript conferme a Henry de Warcop et a cez heires et a sez assignez tout cel rent de vynt south la quel rent vous soloyez rendre a moy et a mes auncetres pur un coltur qe est apelle Plughland en la ville et en la suyle de Warcop vous pree et vous mant qe al dit Henry desornevant et a sez heires et a sez assignez cum en payant la dit rent et en faisant les services de droit duys et costomez com vous soloyez faire a moy et a mes auncetres soiez entendantz et respoynanz issi qe ie ne mez heires ne nul homme de par nous rien devers vous ne devers lez voz desornevant rien pourroins chalangey ne demander En tesmoigne de quel chose a cest escrip ay mis moun seal Par iceux tesmoignes Ric[hard] de Blenkansopp Thomas de Warcopp dons viscount de Westmer Will[ia]m de Covedale [] Done a Warcop le lundy proschein apres la fest de decollation de seynt Iohan Baptist en le an du regne de Roy Edward le fitz Henry primer