Charter Document - 05810055
| Charter Number: | 05810055 |
|---|---|
| Cartulary Title: | Materials for the History of the Church of Lancaster |
| Charter Language: | Latin |
| Charter Origin: | Religious |
| Charter Type(s): | Arbitration |
| Date: | 1298 |
| Date type: | Internal, Regnal, Feast |
| Resource Link(s): |
|
Charter:
Universis pateat per presentes quod cum inter fratrem Johannem de Reyo Priorem de Lanc[astrie] et ejusdem loci monachos ex parte una et dominum Eustachium rectorem ecclesie de Halton in Lonesdale ex altera super quibusdam decimis garbarum provenientibus de quibusdam particulis terre provenientibus ad grangiam abbatis de ffurneys que dicitur Baumount orta fuisset materia questionis ex eo quod dictus Prior dictam decimam suam de Lanc[astre] et prefatus Eustachius ad ecclesiam suam de Halton de jure hinc inde pertinere asserebant Amicis communibus intervenientibus prefati Prior [et] rector tactis sacrosanctis evangeliis ordinacioni et dicto Willelmi Inge domini Johannis de Dicton et Rogeri Brabazon se submiserunt alto et basso super contencione antedicta Tandem presentibus partibus et aliis fide dignis prefati Willelmus Johannes et Rogerus habito peritorum consilio ordinaverunt quod predictis Priori et monachis et ecclesie beate Marie Lanc[astrie] decime dicte culture libere et integraliter de cetero remanerent absque reclamacione seu impedimento prefati Eustachii rectoris ecclesie de Halton antedicte Et si aliqua pars dictarum decimarum per dictum rectorem de Halton seu homines suos fuisset amota seu asportata quod sine dilacione ea pars predictis Priori et monachis restitueretur Audita vero ordinacione predicta predictus Eustachius eam totaliter acceptavit et garbas decime predicte per suos homines ut dicebatur amotas seu asportatas precepit restitui sine mora In cujus rei testimonium prefatus Prior uni parti istius scripti et predictus Eustachius alteri parti sigilla sua apposuerunt Datum apud Lanc[astriam] in festo decollacionis Sancti Johannis Baptiste anno regni Regis Edwardi vicesimo sexto
Source (click image below to view full size)
