Charter Document - 05780257

Omnibus Christi fidelibus ad quos presens scriptum pervenerit Henricus de la Mare salutem in domino sempiternam Noverit universitas vestra me die apostolorum Simonis et Jude anno regni regis Henrici filii Regis Johannis quinquagesimo dimisisse concessisse ac motu proprie voluntatis mee ad firmam tradidisse domino Edwardo Illustris Regis Anglie primogenito totum Manerium meum de Wynterborne Gunnore cum omnibus pertinenciis suis cum homagiis et villenagiis redditibus wardis et releviis pratis et pasturis liberis consuetudinibus et escaetis et omnibus libertatibus ad predictum manerium quoquo modo pertinentibus habendum et tenendum de me et heredibus meis prenominato domino Edwardo et quibuscunque personis illud manerium dare vel assignare voluerit ac eorum assignatis quibuscunque ad terminum viginti annorum integraliter et plenarie completorum habendum et tenendum bene et in pace et plenarie per octo annos a tempore presentis concessionis proximo subsequentes nichil inde reddendum michi vel heredibus meis quia predictus dominus Edwardus de predictis octo annis michi plenarie pre manum satisfecit Predictus terminus octo annis integraliter evolutus prenominatus dominus Edwardus et assignati sui per duodecim annos proximo subsequentes reddent michi et heredibus meis seu assignatis meis annuatim decem marcas argenti ad duos anni terminos videlicet ad festum Sancti Michaelis vel infra octabas quinque marcas et ad diem qui vocatur Hokdaye vel infra octo dies post quinque marcas pro omnibus serviciis consuetudinibus et secularibus demandis videlicet sub hac forma Quod si forte contingat quod infra predictum terminum viginti annorum predictum manerium de Wynterbome per recepcionem dotis Matilde uxoris mee diminutum fuerit seu scutagia contribuciones vel tallagia seu hostilitatis manifeste infortunia per oppressiones Regum ac magnatum terre qui pro tempore fuerint futuris temporibus currant in regno Anglie seu recepciones alicuius pecunie in judaismo vel alio quocunque modo unde cum blandum sit de usuris et alienaciones alique terrarum vel reddituum in quorum pacifica possessione ego Henricus de la Mare aliquo tempore extiti per factum meum proprium vel per defectum warencie mei vel heredum meorum facte fuerint vel imposterum aliquo tempore contingere possint volo et concedo pro me et heredibus meis quod omnia huiusmodi inconveniencia predicta in presencia mei seu heredum meorum per testimonium bonorum virorum predicti manerii fideliter et sine fraude computentur et in solucione seu recepcione predictarum decem marcarum annui redditus sine contradiccione mei vel heredum meorum de anno in annum assignatis predicti domini Edwardi integraliter allocentur Preterea volo et concedo pro me et heredibus meis quod si forte contingat quod Matilda consors et uxor mea processu temporis deo disponente me forte subvixerit quod prenominata Matilda habeat et teneat totaliter dotem suam in manerio meo de Alvescote ita videlicet et taliter quod predictum manerium de Wynterborne remaneat ut predictum est prenominato domino Edwardo pro se et assignatis suis integrum pariter et divisum Voluit insuper et concessit ex parte sua prenominatus dominus Edwardus pro se et assignatis suis quod si processu temporis contingat quod predicti assignati sui in solucione predicti annui redditus aliquo tempore forte deficerint quod absit quod ego Henricus de la Mare vel heredes mei seu assignati mei ingrediamur predictum manerium de Wynterborne et illud sine contradiccione predictorum assignatorum domini Edwardi teneamus donec michi et heredibus meis de predicto annuo redditu et visum bonorum et legalium hominum plenarie fuerit satisfactum condicionibus tunc in presenti scripto superius contentis in omnibus inviolabiliter observatis Hanc igitur dimissionem concessionem et voluntariam tradicionem ego Henricus de la Mare et heredes mei et assignati mei prenominato domino Edwardo et assignatis suis quibuscunque warantizabimus acquietabimus et defendemus contra omnes homines et feminas Christianos et Judeos per terminum viginti annorum ut superius predictum est Pro hac autem dimissione warantizacione concessione et voluntaria tradicione dedit michi predictus dominus Edwardus quadraginta sex libras tresdecim solidos et quatuor denarios argenti per manibus ad ardua negocia mea expedienda Et ut hec mea dimissio concessio warantizacio et voluntaria tradicio rate sint et stabiles et robur firmitatis per prenominatum tempus semper optineant ego dictus Henricus de la Mare presenti scripto sigillum meum apponi feci Hiis testibus domino Radulfo de Augiens Waltero de Burges Willelmo de Grymsted Johanne de Grimsted et Reginaldo de Armuiare militibus Jordano de Laverstock Johanne de la Forde Waltero Lovell Clerico Thomas de Caneford Radulfo de Nevule Rogero Suotynge et aliis