Charter Document - 05630430

Notum sit omnibus Christi fidelibus tam presentibus quam futuris ad quos presens scriptum pervenerit quod cum orta esset controversia inter nobilem virum Rannulphum comitem Cestrie et Lincolnie ex una parte et dominum abbatem et conventum sancti Nicholai Andegavensis ex altera super ordinacione prioris et prioratus Spaldinge cuius patronatum gerit dictus comes tandem in hunc modum amicabiliter compositum est inter eos videlicet quod cum dictum prioratum de Spaldinge per mortem prioris vel aliter vacare contigerit abbas sancti Nicholai Andegavensis qui pro tempore fuerit pro se et conventu suo sancti Nicholai Andegavensis per se vel per procuratorem suum et conventus Spaldinge predicto comiti et heredibus suis post eum predictum prioratum vacare tempestive significabunt Vocato siquidem tempestive et rationabiliter dicto abbate sancti Nicholai Andegavensis a conventu Spaldinge apud monasterium sancti Nicholai Andegavensis et licencia a dicto comite et heredibus suis post eum ab abbate sancti Nicholai Andegavensis et conventu de Spaldinge per se vel per procuratores eorum eligendi ad dictum prioratum priorem petita et obtenta idem abbas pro se et conventu sancti Nicholai Andegavensis vel procurator ipsorum ad dictum prioratum accedat et tunc idem abbas pro se et conventu sancti Nicholai Andegavensis vel procurator eorum pro eis et conventu Spaldingensi priorem eligent idoneum ad dictum prioratum de intus vel de extra ita tamen quod nullum eligent qui prius professionem non fecerit abbati predicto vel successoribus suis Electum autem in priorem dicto comiti vel heredibus suis presentabunt qui a dicto comite vel heredibus suis receptus cum litteris ipsius comitis vel heredum suorum patentibus domino episcopo Lincolniensi presentabitur qui circa eum quod debebit salvo iure abbatis et conventus sancti Nicholai Andegavensis et dicti comitis et heredum suorum exequetur salva dicto abbati et successoribus suis in perpetuum iurisdiccione regulari in dicto prioratu tanquam abbatibus suis secundum ordinem monachalem Si vero dictum abbatem vel successores suos rationabiliter vocatos propter discordiam regum et regnorum Francie et Anglie vel ob alia inpedimenta contigerit non venire vel procuratorem sicut predictum est non mittere infra tres menses post vacacionem dicti prioratus conventus de Spaldinge nichilominus licencia eligendi petita et obtenta tunc eliget sibi priorem et presentabit secundum quod premissum est salvo iure in posterum predictorum abbatis et conventus sancti Nicholai Andegavensis de aliis prioribus eligendis sicut superius est notatum Et in huius rei testimonium uterque illorum scilicet dictus abbas pro se et conventu suo et dictus comes sigilla sua vice mutua huic scripto modo cyrographi confecto apposuerunt Actum anno domini MCC tricesimo primo mense marcio