Charter Document - 05580017
| Charter Number: | 05580017 |
|---|---|
| Cartulary Title: | Chronicon Abbatiae de Evesham ad annum 1418 |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1230 |
| Date type: | Internal, Calendar, Papal |
| Resource Link(s): |
|
Charter:
Gregorius episcopus servus servorum Dei venerabili fratri episcopo et dilecto filio priori de Conventre salutem et apostolicam benedictionem Quum dilecti filii monachi monasterii de Evesham presentassent nobis electionem quam de persona Thome prioris ejusdem monasterii duxerant faciendam humiliter supplicantes ut dignaremur electionem eandem tanquam celebratam de persona idonea confirmare Nos ejus examinato processu aliisque negotii circumstantiis attente pensatis supplicationem eorum non duximus admittendam Ne vero dictum monasterium longa vacatione grave dispendium patiatur discretioni vestre per apostolica scripta mandamus quatenus si prefati monachi infra mensem post monitionem vestram ad electionem duxerint procedendum vos electionem eorum si fuerit canonica et electi persona idonea auctoritate apostolica confirmetis tuque frater episcope munus electo benedictionis impendas Alioquin vos eadem auctoritate provideatis de persona literata que laudabilis sit conversationis et vite de gremio ejusdem ecclesia si ibi invenitur idoneus alioquin de alia prefato monasterio in abbatem Datum Laterani nonas Maii pontificatus nostri anno quarto
Source (click image below to view full size)
