Charter Document - 05580012

Innocentius episcopus servus servorum Dei dilectis filiis abbati et fratribus Eveshamensis cenobii salutem et apostolicam benedictionem Ex ore sedentis in throno procedit gladius bis acutus Quoniam ex ore Romani pontificis qui presidet apostolica sedi rectissima debet exire sententia que contra justitiam nulli parcat sed reddat quod suum est uniqueque Quum igitur inter vos et venerabilem fratrem nostrum Wigornensem episcopum super monasterii vestri subjectione ac libertate controversia verteretur et nos eam examinandam commisissemus judicibus delegatis ipsi eandem causam sufficienter instructam ad nostram presentiam remiserunt certum partibus terminum prefigentes quo cum instrumentis et attestationibus nostro se conspectui presentarent sententiam receptura Partibus igitur in presentia nostra per procuratores idoneos constitutis audientiam prebuimus liberam et benignam Et quidem monasterii vestri proposuit procurator quod idem monasterium ab ipsa sui fundatione liberum exstitit et exemptum ad hoc probandum privilegia predecessorum nostrorum inducens duo videlicet Constantini unum Innocentii et alterum Alexandri nec non indulgentias Clementis et Celestini quorum usum continuum a longis retro temporibus per depositiones testium ostendere nitebatur In primo siquidem privilegio Constantini continebatur expressum quod sancta recordationis Ecgwinus Wigornensis episcopus ad apostolicam sedem accedens visionem quandam qua se beata Virgo Maria manifestavit eidem prefato predecessori nostro reverenter exposuit et tunc temporis duo reges Anglorum Kenredus et Offa cum quibus jam dictus episcopus apostolorum limina visitavit in loco visionis ostense de bonis suis plurima beneficia in presentia ejusdem predecessoris nostri regia libertate donarunt qua ipse auctoritate apostolica confirmavit quatenus in eodem loco monachornm congregatio secundum beati Benedicti regulam qua minus in illis partibus tunc vigebat ad Divini Nominis constitueretur honorem Unde prefatus pontifex Brithwaldo Brittanniarum primati per apostolica scripta mandavit ut coadunato concilio constitueret ovile divinitus preostensum apostolica auctoritate munitum regia libertate donatum sibi et successoribus suis [memorato Ecgwino episcopo assentiente] curam animarum ejusdem ecclesie precipue injungendo ut ab omni pervasorum impulsu et tyrannorum incursu potestate sibi tradita defensaret si quid vero sinistre partis inibi comperiretur oriri ejusdem primatis auribus potius deferretur quam per alicujus occultam sententiam locus sanctus depravaretur injuste Ipsum ergo locum quem antedicti reges libertati donarunt idem predecessor noster apostolica sedis auctoritate donavit ut nullus cujuscumque ordinis homo quod ipse constituerat depravare aut diminuere attentaret In secundo vero privilegio ejusdem Constantini pape perspeximus contineri quod ipse prefato primati per apostolica scripta mandavit ut ecclesias Dei per Brittanniam constitutas protegeret et foveret Inter quas eam que nuperrime tunc a venerabili viro Ecgwino episcopo apostolica et regia auctoritate fuerat constituta ditioni ejus precipue submittebat ut eam ab omni adversariorum impugnatione liberam inperpetuum reddere procuraret constituens ut idem locus sub monarchia proprii abbatis ab omni tyrannica exactione sit liber et nullus cujuscumque ordinis homo aliquod ibi inferre gravamen presumat Abbas autem secundum auctoritatem canonicam vel de ipso monasterio vel de parochia Wictiorum a fratribus eligatur qui libere ac canonice sine aliqua exactione in eadem ecclesia benedictus ob reverentiam venerabilis Ecgwini qui episcopali sede dimissa in eodem monasterio factus est abbas annulo in celebratione solummodo missarum utatur primumque locum semper obtineat post presulem Wictiorum Ex horum privilegiorum capitulis monasterii vestri procurator nitebatur ostendere quod ipsum monasterium a prima sui fundatione ab omni episcopali jurisdictione fuit prorsus exemptum tum quia dicitur apostolica tantum et regia auctoritate constructum [unde non nisi ad apostolicam sedem in spiritualibus et regiam coronam in temporalibus intelligitur pertinere quum summus pontifex non consueverit aliquod monasterium ut sua construatur auctoritate mandare nisi quod in fundo sibi donato fuerit construendum] tum quia locum ipsum quem reges donasse dicuntur regia libertati et ipse donavit ut sicut illi donaverunt eum libertati quantum ad temporalia sic et iste quantum ad spiritualia intelligatur libertati donasse quum ad illos utique temporalia ad istum spiritualia pertinerent tum etiam quia curam animarum ejusdem ecclesie precipue injunxit Brittanniarum primati quam et ditioni ejus precipue dicitur submisisse ut siquid ibi oriretur sinistri per ipsius corrigeretur industriam et cautelam [unde videtur correctionem ipsius loci ei solummodo commisisse sicque ad alium minime pertinere] tum quia prefatum locum sub monarchia proprii abbatis manere decrevit unde quum monarchia interpretetur unicus principatus videtur quod abbas ipsius loci solus in eodem loco principalem obtinet potestatem Quod autem privilegiorum ipsorum verba intelligi debeant tali modo sequentia privilegia manifestius declarare videntur Nam in privilegio felicis memoria Innocentii continetur ne aliquis episcopus in ipsa abbatia vel in capellis ipsius synodum vel capitulum ordinationes aut missas publicas nisi invitatus ab abbate et fratribus ipsius loci celebrare presumat Et quum abbas in eodem monasterio fuerit electus absque omni exactione a quocumque maluerit episcopo in ipsa benedicatur ecclesia dummodo catholicus fuerit et gratiam habeat apostolice sedis Idem etiam Innocentius Constantini vestigiis inherendo decrevit ut solummodo penes abbatem ipsius loci totius domus et ecclesie aliorumque locorum ad eandem ecclesiam pertinentium pastoralis cura consistat et eorundem ordinatio tantum in ipsius potestate permaneat sicut est hactenus observatum In privilegio vero Alexandri papa perspicitur contineri ut chrisma oleum sanctum consecrationes altarium ordinationes clericorum qui ad sacros fuerint ordines promovendi a quocunque maluerint episcopo communionem et gratiam apostolica sedis habente fratres ejusdem loci suscipiant statuto ut Wigornenses episcopi aliquid ab eis injuste non exigatis sed his tantum contenti permaneant que antecessores eorum antecessoribus suis constat rationabiliter impendisse In fine vero subjungitur quod salva sit apostolice sedis auctoritas neo dicitur quod dioecesani episcopi canonica sit salva justitia quum in monasteriis non exemptis secundum approbatam ecclesia Romana consuetudinem dioecesanis episcopis canonica justitia conservetur In indulgentiis autem bona memoria Clementis et Celestini patenter innuitur quod idem cenobium ad jurisdictionem beati Petri nullo pertineat mediante quum hoc in premio premittentes sic inferant consequenter hac itaque ratione inducti usum chirothecarum et annuli dalmatica tunica sandaliorum et mitre tibi duximus concedendum Per id ergo quod pastoralis cura totius dominis et ecclesie penes abbatem solummodo decernitur permanere illud dilucidatur ab Innocentio quod fuerit a Constantino statutum ut videlicet idem locus sub monarchia proprii abbatis liber existat Unde quum pastoralis cura totius domus et ecclesia penes abbatem solummodo debeat permanere patet profecto quod episcopus pastoralem ibi curam exercere non debet quum et abbas illius loci absque omni exactione infra suam ecclesiam debeat benedici unde nec professio nec obedientia debet ab illo requiri Quia vero quedam ad pastoralem sollicitudinem pertinentia per se ipsum abbas exercere non potest ut nihil ei desit quod pertineat ad plenitudinem libertatis conceditur illi ab Alexandro ut ecclesiastica sacramenta libere percipiat a quocumque maluerit episcopo communionem et gratiam apostolica sedis habente Per id autem quod idem locus asseritur ad jurisdictionem beati Petri solummodo pertinere sicut innuitur in indulgentiis Clementis et Celestini videtur illud manifestius declaratum quod Constantinus papa dicitur locum ipsum libertati donasse tutelam ejusdem Brittanniarum primati tanquam vicario suo vel legato committens Porro in privilegio Constantini quiddam contineri perspicitur per quod idem cenobium videtur ad jurisdictionem episcopi pertinere videlicet ut abbas ejusdem loci primum locum post Wictiorum presulem semper obtineat unde quum locum istum obtinere non possit in generali concilio neque provinciali quoniam absonum esset ut abbas primum post illum super alios episcopos resideret relinquitur ergo quod locum istum in episcopali synodo intelligatur habere quare tenetur ad synodum episcopalem accedere ac per hoc ipsius statuta recipere ac servare In privilegio vero Alexandri pape quiddam aliud continetur per quod dioecesanus episcopus in eodem cenobio jurisdictionem suam etsi non in omnibus in quibusdam tamen retinuisse videtur quum in illo dicatur ut Wigornenses episcopi a fratribus ejusdem loci aliquid injuste non exigant sed tantum his contenti permaneant que predecessores eorum antecessoribus suis constat rationabiliter impendisse unde constat quod abbates episcopis aliquas de suis rationibus exhibere tenentur Nos igitur his et aliis diligenter auditis et perspicaciter intellectis quum a neutra parte per testes prescriptio sit probata de communi fratrum nostrorum consilio sententialiter definimus quod Eveshamense cenobium liberum in capite est tanquam ab episcopali jurisdictione prorsus exemptum soli Romano pontifici et ecclesia Romane subjectum tutela tamen ipsius Cantuariensi archiepiscopo reservata In membris autem videlicet illis que non probantur exempta dioecesano episcopo ipsum decernimus subjacere propter que abbas ad synodum ejus debet accedere primumque locum post Wigornensem episcopum obtinere Pro ipsis quoque membris ut diximus non exemptis idem abbas tenetur Wigornensi episcopo exhibere reverentiam obsequium et honorem quibus Wigornensis episcopus sibi competenter exhibitis debet manere contentus Quia vero privilegium meretur amittere qui concessa sibi abutitur libertate volumus et mandamus ut quanto liberiores estis a servitiis secularibus tanto vos arctius mancipetis divine per omnia servituti Decernimus ergo ut nulli hominum liceat hanc paginam nostre definitionis infringere vel ei ausu temerario contraire Siquis autem hoc attentare presumpserit indignationem omnipotentis Dei et beatorum Petri et Pauli apostolorum Ejus se noverit incursurum Datum apud sanctum Petrum quinto decimo Kalendas Februarii pontificatus nostri anno octavo