Charter Document - 05580007

Constantinus episcopus servus servorum Dei Britwaldo Brittanniarum primati salutem et apostolicam benedictionem Divina dispensatione ad hoc promoti ut apostolica auctoritate paci ecclesiarum insistamus tue fraternitati denunciamus quatenus ecclesias Dei per Brittaniam dispositas tua ipsius et sanctorum apostolorum auctoritate protegas ne quis pervasor cujuscunque ordinis a Deo et nobis constituta privilegia subruat Inter quas eam qua nuperrime a venerabili viro Ecgwino nostra et regia auctoritate constituta est tue ditioni precipue submittimus ut tibi et posteris tuis potestate divinitus concessa ab omni eam adversariorum impugnatione liberam in perpetuum reddas Justum enim nobis videtur ut quoniam isdem venerabilis Ecgwinus exemplum Domini [secutus] se humiliando inibi effectus est abbas idcirco hec ecclesia secundum quod per legatum suum Ethelwoldum expetiit ampliorem dignitatem a nostra sede sui merito obtineat Constituimus ergo in nomine Domini ut isdem locus sub monarchia proprii abbatis sit liber ab omni tyrannica exactione et nullus cujuscunque ordinis homo aliquod gravamen ibi inferre audeat Defuncto autem abbate secundum canonicam auctoritatem vel de ipso monasterio vel de parochia Wictiorum abbas a fratribus ejusdem loci eligatur qui in eadem ecclesia libere et canonice sine aliqua exactione consecratus ob reverentiam venerabilis Egwini annulo in celebratione missarum solummodo utatur primumque locum post Wictiorum presulem nostra auctoritate jugiter obtineat Si quis igitur hoc privilegium infringere voluerit sive in loco monachorum clericos immittere tentaverit coram Deo et angelis Ejus in perpetuum sit anathema Si quis vero hanc nostram auctoritatem servaverit conservet eum Deus in eternum Scripta est hec epistola anno Dominica Incarnationis septingentesimo tertio decimo presidente apostolice sedi papa Constantino et hoc signum sancta crucis propria manu faciente