Charter Document - 05580003

G[alfridus] Dei gratia episcopus et J[orbertus] prior Coventrie et R[icardus] archidiaconus Norhamtonia R[ogero] Dei gratia abbati et conventui Eveshamie salutem in Domino Noverit universitas vestra nos auctoritate nobis a domino papa commissa observato juris ordine confirmasse sententiam suspensionis quam dominus Wigornensis episcopus in vos et monasterium vestrum propter inobedientiam vestram promulgavit qua juxta tenorem mandati domini papa usque ad condignam satisfactionem est observanda Licet autem in vos pro delicti vestri qualitate durius forsan esset animadvertendum mitius tamen vobiscum agere volentes modum satisfactionis sub hac forma temperavimus videlicet ut monasterium vestrum et tota congregatio vestra ab illa hora qua dominus Wigornensis satisfactionem de delicto vestro recepturus ad monasterium vestrum accesserit ab omni cesset officio divino et campanarum pulsatione per triduum continuum Quo expleto assumantur de congregatione vestra tres decem monachi qui divina celebrent in ecclesia vestra per tres septimanas continuas ad majus altare duntaxat aliis omnibus preter predictos tres decem toto illo tempore ab omni divino officio cessantibus Completis vero illis tribus septimanis predicti tres decem per tres alias septimanas ab omni divino officio cessabunt ceteris omnibus qui prius cessaverant ad officium divinum restitutis Decrevimus etiam ut in adventu domini Wigornensis ei ad januam majorem abbatia vestre nudis pedibus omnes occurratis ibique coram eo prostrati de commisso vestro veniam humiliter postuletis presentibus et astantibus cum eo quot et quibus voluerit viris religiosis presbyteris et clericis et servientibus Deinde capitulum vestrum una cum eodem ingressi cum viris religiosis quotquot episcopus secum ducere voluerit singuli singulas ab eodem recipiatis disciplinas Hunc autem satisfactionis modum procuratori vestro sententialiter injunximus et universitati vestre benigne suscipiendum et humiliter observandum mandamus Valete