Charter Document - 05550018
| Charter Number: | 05550018 |
|---|---|
| Cartulary Title: | Oxford City Documents |
| Charter Language: | Latin |
| Charter Origin: | Lay |
| Charter Type(s): | Inquest |
| Date: | 1306 |
| Date type: | Internal, Feast, Regnal |
| Resource Link(s): |
|
Charter:
Contigit die dominica proxima post festum Assumptionis Beate Marie virginis anno regni regis Edwardi XXXIV quod Gilbertus de Foxlee clericus obijt in Hospitio suo ubi ipse manebat in parochia S[ancti] Petri Orient Oxon circa horam nonam et die lune proximo sequente visus fuit per Thomam Lisewys Coronatorem domini Regis Ville Oxon et habuit vnam plagam in tibia sua sinistra iuxta genu suum latitudinis IV pollicum circumquaque et profunditatis vnius pollicis et dimidii Inquisitio capta fuit inde coram dicto Coronatore per sacramentum [] Qui dicunt super sacramentum suum quod die Jouis in vigilia natiuitatis S[ancti] Johannis Baptiste proxime precedentis Cissores Oxon et alij de villa qui fuerant cum eis vigilabant in Shoppis suis per totam noctem cantantes et facientes solatia sua cum Cytharis Viellis et alijs diuersis instruments prout moris est et consuetudo ibidem et alibi facere propter solemnitatem illius festi Et post mediam noctem cum intellexissent neminem vagantem ibi in stratis exierunt de shoppis suis et alij qui erant cum eis et ducebant coreas suas in alto vico contra draperiam et ut sic ludebant superuenit predictus Gilbertus de Foxle cum quodam gladio nudo et extracto in manu sua et mouebat statim contentionem versus eos volens omnimodo penetrasse coream illam videntes autem quidam illorum qui habuerunt notitiam persone venerunt ad eum et voluerunt eum abduxisse ab eis et rogabant eum ne malefaceret cuiquam at idem Gilbertus propter hoc noluit promittere sed statim prosiliit ab eis et venit retro insultum faciendo in quendam Willelmum de Cleydon et voluit cum gladio suo amputasse manum suam ut fuit in corea illa nisi se citius retraxisset et statim currebant ad eum Henricus de Beumont Cruisor Thomas de Bloxham Willelmus de Leye seruiens Johannis de Leye et predictus Willelmus de Cleydon et predictus Henricus cum quodam gladio vulnerauit ipsum in brachio suo dextro et predictus Thomas vulnerauit ipsum cum quodam misericorde in dorso predictus vero Willelmus de Cleydon vulnerauit ipsum in capite ita quod cecidit Et statim postea Willelmus de Leye cum quadam hac que vocatur sparsh vulnerauit ipsum in tibia sua sinistra et fecit ei predictam plagam iuxta genu vnde obijt die dominico supradicto sed vixit per VIII hebdomadas et II dies et dimidiam et habuit omnia iura sua ecclesiastica
Source (click image below to view full size)
