Charter Document - 05479931

Frater Philippus prior monasterii Beati Petri Gloucestriae et ejusdem loci conventus dilectis sibi in Christo fratribus et commonachis suis Johanni de Gamages priori Herefordiae Johanni de Worme priori Bromfelde Willelmo de Schrivenham dicto priori de Kilpek Henrico de Wiggemore dicto priori de Eweny Thomae de Tyringham dicto priori de Stanleya et Ricardo de Beyburia dicto priori de Ewias salutem et sinceram in Domino caritatem Cum bonae memoriae Reginaldo de Hamme nuper abbate nostro viam universae carnis ingresso ac ipsius corpore prout decet ecclesiasticae tradito sepulturae diem Dominicam proximam post festum Sancti Michaelis proximo subsequentem praefixerimus ut ad electionem futuri abbatis in nostro capitulo faciendam annuente Domino procedatur vos citamus peremptorie monemus et exhortamur in Domino firmiter injungentes quatinus dicta die in nostro capitulo pro dicta electione celebranda una nobiscum personaliter intersitis Si autem quod absit canonice fueritis impediti vel si nolueritis interesse litteras vestras patentes nobis super hoc dirigatis vices vestras aliquibus de commonachis nostris si libeat committentes alioquin nos dictis die et loco ad electionem faciendam non expectata vestra praesentia invocata Spiritus Sancti gratia procedemus Data Gloucestriae in nostro capitulo quinto kalendas Octobris anno Domini millesimo ducentesimo octogesimo quarto Acta in praesentia dominorum Philippi prioris monasterii antedicti Hugonis subprioris Henrici praecentoris et aliorum monachorum ejusdem loci In cujus rei testimonium sigillum commune monasterii antedicti hiis litteris est appensum