Charter Document - 05470973

Memorandum quod cum inter dominum Willelmum le Chamberlain perpetuum vicarium ecclesie Beate Marie ante portam abbatie Gloucestrie ex parte una et viros religiosos abbatem et conventum monasterii Sancti Petri Gloucestrie super sepultura seu funeratione familiarium dictorum religiosorum infra abbatiam predictam vel extra decedentium decimatione ovium ipsorum religiosorum in parochia dicte ecclesie pascentium et cubantium et existentium in custodia parochianorum ecclesie memorate deterioratione corredii ipsius vicarii subtractione decimarum provenientium de duobus croftis apud Budelesmulle et unius herieti pro Johanne Perys parochiano suo defuncto et pensionis annum quinque marcarum a dicto vicario debite eisdem religiosis et aliis rebus contentio haberetur tandem pro amfractibus litium amputandis et quiete perpetua obtinenda dictus dominus Willelmus vicarius nostre ordinationi fratris Johannis permissione divina abbatis monasterii predicti super premissis pure sponte et absolute totaliter se submisit prestito corporali sacramento primitus ab eodem quod nostre ordinationi pareret et ipsam in omnibus suis articulis inviolabiliter observaret cujus submissionem nos abbas predictus admittentes Deumque habentes per oculis inquisita veritate sollicite de premissis ordinamus et diffinimus quod corpora omnium familiarium dictorum religiosorum infra abbatiam vel extra in quacumque parte parochie ecclesie predicte decedentium in cimiterio dictorum religiosorum sepeliantur pro ipsorum libito voluntatis et quod dictus vicarius et sui successores hujusmodi mortuorum primam habeant missam in ecclesia Sancte Marie predicta cum omnibus oblationibus et obventionibus occasione hujusmodi inibi faciendam Item quod dicti religiosi non teneantur ad prestationem decimarum ovium suarum in cujuscumque custodia fuerint infra parochiam memoratam eo quod sunt ipsius ecclesie Beate Marie rectores et super non solvendis hujusmodi decimis privilegialiter et sufficienter sunt muniti sed omnium ovium aliorum in custodia dictorum religiosorum ubicumque in parochia predicta existentium dictus vicarius percipiat decimas universales Item quod dictus vicarius corrodium suum percipiat in abbatia predicta sicuti fuerat consuetum Item quod dicti religiosi non teneantur ad prestationem decimarum de duobus croftis predictis nec mortuarii de Johanne Perys eo quod ante petitionem vel vendicationem ipsius vicarii dicti crofti in propriam terram fuerant restituti et eorum terra propria tunc et nunc fuit et est indecimabilis cuicumque Item quia Johannes Perys fuit tempore mortis sue et ante terram servilem tenens ab eisdem cujus mortuarum sicuti de omnibus tenentibus sic ad dictos religiosos debeat pertinere Item quod dictus vicarius dicte pensionis quinque marcarum annue arreragia infra octo dies sacriste abbatie predicte plenaria persolvat ac ipsam pensionem singulis annis quibus vixerit vicarius ad quatuor anni terminos videlicet ad festa Sancti Michaelis Sancti Andree Annunciationis Dominice et Sancti Johannis Baptiste pro equali portione dicto sacriste qui pro tempore fuerit annuatim persolvat sine lite Item volumus et ordinamus quod dictus vicarius liberationem feni pro uno equo sicut consueverat obtineat in futurum Et quod dictus vicarius in festis Natalis Domini per quatuor dies et Pascha per tres et Pentecostes per duos dies cum uno capellano uno diacono et duobus clericis infra abbatiam predictam in mensa recipiatur et aliis festis sicuti fuerat consuetum [in cujus rei testimonium sigillum nostrum apposuimus huic scripto et ad majorem probationem sigillum decanatus Gloucestrie similiter est appensum ad nostri instantiam et rogatum Datum et actum Gloucestrie die Sancti Mauri abbatis anno Domini millesimo trecentesimo quarto]