Charter Document - 05460811

Hec est conventio facta anno Domini millesimo ducentesimo septuagesimo septimo dominica post festum Sancti Oswaldi regis et martyris inter Walterum le Sevare burgensem Gloucestrie ex parte una et viros religiosos abbatem et conventum Sancti Petri de eadem ex altera videlicet quod predictus Walterus sacramento corporaliter prestito se predictis religiosis obligavit quod fidelis eorum creditor existet quamdiu vixerit et quantumcunque necesse ad expendendum in domo sua et in maneriis suis habuit de quolibet genere piscis ad manus dicti Walteri qualitercunque ex empto venientis in Gloecestria et extra ubicumque aliquem piscem poterit perquirere sufficienter inveniet singulis diebus vite sue sub eodem foro et pretio quo ipse vel sui illum piscem poterunt emere seu comparare et nullum lucrum ex emptione a predictis religiosis recepturus Promisit insuper bona fide predictus Walterus quod providentiam faciet ad opus dictorum religiosorum de quolibet genere piscium tempore suo quo major fuerit de illo pisce abundantia et melius forum ut de anguillis suo tempore de luciis et aliis piscibus suis temporibus et eosdem faciet bene custodiri quousque dicti religiosi ipsis indiguerint pro eodem pretio pro quo eos primo comparavit liberandos eosdem cum voluerint Et si aliquem piscem penes se tanto tempore retinuerit vel retineri fecerit quod nec possit nec debeat vendi eodem pretio quo emebatur si ipso pisce indigeant dicti religiosi tantum dabunt pro eodem quantum tunc valebit vel quantum alii essent daturi et non amplius Et si contingat quod dicti religiosi piscem salsum vel alium in villa Gloucestrie voluerint emere alium forte quam habuerit idem Walterus ad manus tunc idem Walterus cum emptoribus dictorum religiosorum adibit ipsos qui hujusmodi piscem habuerint ad vendendum meliori foro quo poterit dictum piscem ad opus dictorum religiosorum mercaturus non tamen nisi voluerit predicto pisce pacturus Dicti autem religiosi totam pecuniam quam idem Walterus expenderit in emptione ad opus eorum facta ut supradictum est eidem solvent quatuor terminis anni sine ulteriori dilatione videlicet in festo Sancti Michaelis singulis annis sive in quintana in festo Nativitatis Dominice seu in quintana in festo Pasche seu in quintana in Nativitate Sancti Johannis Baptiste seu in quintana prout per dicam inter ipsum Walterum et coquinarium dictorum religiosorum de pretio emptionis piscis factam singulis predictis terminis poterit liquere Si vero alterutra pars contra istam conventionem aliquo tempore qualicunque modo indebite venerit et hoc per fide dignos probari poterit illa pars que fidem in parte vel in toto non observaverit parti alteri pro qualibet transgressione quadraginta solidos nomine poene persolvet Ut autem prefatus Walterus fidelis ipsorum religiosorum creditor existat prout superius dictum est omni fraude seu simulatione remota predicti religiosi molendinum suum quod vocatur Budelesmulne cum pertinentiis suis quod estimatur per annum ad sex marcas prefato Waltero concesserunt tenenda de eisdem ad vitam suam secundum formam et tenorem cujusdam carte eidem inde confecte Preterea gratiose concesserunt fidem religiosi prefato Waltero unam robam annuatim ab eisdem recipiendam de pretio viginti solidorum quamdiu fidelis eorum creditor ut supradictum est extiterit In cujus rei testimonium []