Charter Document - 05460565

Notum sit omnibus tam presentibus quam futuris quod ego Rogerus comes Herefordie et ego Walterus frater comitis cum propter imminentem nobis necessitatem violenter et injuste detinuisse mus aliquanto tempore pratum quod appellatur Nunnehamme anno tandem ab Incarnatione Domini millesimo centesimo quinquagesimo quarto jus quod ecclesia Sancti Petri Gloucestrie in eodem prato ab antiquo habuerat recognoscentes assensu Henrici fratris nostri et hominum nostrorum consilio reddidimus Hamelino abbati et monachis Gloucestrie totum idem pratum atque concessimus ut ecclesia Sancti Petri teneat illud libere et quiete perpetualiter utrum voluerit in pratum vel pasturam nec sit qui eidem in aliquo sine abbatis et monachorum permissione communicet sed neque nos in posterum nec heredes nostri nec homines aliquam in eo consuetudinem aut participationem habebimus neque ullum omnino impedimentum quominus ad commodum et libitum suum monachis eodem uti liceat perquiremus sed potius ne quis amodo injuriam eis aut violentiam de hoc faciat prohibemus Recognovimus etiam presenti scripto testamur totum pratum quod appellatur Prestehamme similiter esse de jure Sancti Petri et quod totam ejusdem prati partem que est ab eo ubi fossatum fratrum fuit tempore avi nostri Walteri de Gloucestrie usque in Savernam ex omni parte de abbate et monachis ex commodato tenemus Volentesque redintegrari jus ecclesie quod per nos fuerat diminutum concessimus ut tota pars reliqua sit in perpetuum libera et quieta in dominio monachorum et eam partem que est a magno fossato quod comes Milo fecit usque ad divisam partis illius quam tenemus ut dictum est ex ecclesie commodato habeat in perpetuum sicut hactenus habuerunt Totum vero aliud quod est ex altera parte magni fossati usque ad lacum qui dividit Prestehamme et Nunnehamme teneat ecclesia Sancti Petri in perpetuum in pasturam propriam et dominicam ita ut nemo deinceps consuetudinem aliquam vel participationem in ea sibi clamet aut vendicet excepto quod ex abbatis et monachorum permissione singulis annis in vigilia Pentechostes vel quando eorum animalia mittentur in predictam pasturam de Prestehamme nostra quidem animalia de quibus certum erit quod propria sint et dominica curie de Berthona cum duobus averiis eidem solummodo pasture de Prestehamme communicabunt Nullum autem aliud animal neque de Berthona neque de tota terra nostra vel hominum nostrorum neque de tota Gloucestrie pasturam intrabit sine voluntate et licentia monachorum sed ipsis licebit in eam absque ullo impedimento et contradictione tanquam in suam rem propriam et quod voluerint admittere et excludere quod voluerint Si quis igitur de nostris sive de tota Gloucestrie sive cujuscunque sit et undecumque de cetero miserit equum aut jumentum aut cujuscunque generis animal in Prestehamme vel in Nunnehamme vel in aliis pratis aut pascuis abbatie vel aliquid in eis contra voluntatem abbatis et monachorum aut hujus carte tenorem usurpaverit habeant ipsi liberum jus et plenarium potestatem justitie faciende et comprehendendi per ministros suos quicquid in suo alienum invenerint atque detinendi donec inde sibi sit in curia Sancti Petri sufficienter et plenaria satisfactum Hanc itaque recognitionem redditionem et concessionem fecimus pariter ego Rogerus comes Herefordie et ego Walterus frater comitis et insuper donavimus in elemosinam Deo et Sancto Petro et monachis unam virgata terre in Talgarde liberam et quietam ab omni consuetudine et servitio cum homine qui eandem virgata tenebat Quibus omnibus primum quidem capitulo concessis deinde in ecclesia presente Hamelino abbate et conventu super altare Sancti Petri per textum oblatis postremo cartam hanc sigillis nostris ad plenam et perpetuam supradictorum omnium confirmationem impressimus tertio kalendas Aprilis anni supradicti Hujus rei testes sunt Walterus de Clifforde et Osbernus de Westberia