Charter Document - 05450599
| Charter Number: | 05450599 |
|---|---|
| Cartulary Title: | The Latin Cartulary of Godstow Abbey |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1358 |
| Date type: | Internal, Feast, Regnal |
| Resource Link(s): |
|
Charter:
Hec indentura facta inter abbatissam et conventum de Godestowe ex parte una et priorem et conventum sancte Frideswyde Oxon ex parte altera testatur quod predicti abbatissa et conventus et prior et conventus antedicti concordarunt modo subscripto videlicet quod dicti abbatissa et conventus dabunt et concedent dictis priori et conventui unam placeam siti molendini vocati Boymulle cum omnibus insulis aquis piscariis gurgitibus viis dicte placee siti molendini spectantibus ac etiam duos buttos terre vocatos le Mulacre cum duabus placeis in Bruggesete unde una iacet inter tenementum abbatis de Oseneye ex parte orientali et semitam ducentem versus Ziftele ex parte occidentali alia vero placea iacet ex opposito Bollesshepene inter tenementum Ricardi le Deye ex parte orientali et tenementum Johannis le glovere ex parte occidentali cum tota illa terra iacente in campo de Wolegaricote vocata Twysdelow et communia eiusdem terre cum libere ingressu et egressu ad eandem cum omnibus suis pertinentiis habenda et tenenda dictis priori et conventui et eorum successoribus imperpetuum in escambium terrarum et prati vocatorum Dylmereswelle Horestone et Hawslondich que dicti prior et conventus dabunt et concedent dictis abbatisse et conventui et eorum successoribus imperpetuum salva semper dictis priori et conventui et eorum successoribus decima de terra et prato de Dylmereswelle habenda et tenenda dictis abbatisse et conventui et eorum successoribus imperpetuum Item etiam dicti abbatissa et conventus et prior et conventus antedicti concordarunt quod utraque pars possit libere facere commodum suum in omnibus dictum escambium tangentibus sine aliqua inquietatione utriusque partis ut supradictum est quousque dicte partes sumptibus communibus eorundem licentiam domini regis et aliorum quorum inter est in hac parte de escambio predicto faciendo licite et legitime valeant optinere Et ad ista omnia bene et fideliter adimplenda dicte partes mutuo se obligarunt in CC li sterlingorum sub ista conditione quod si partes antedicte contra dictas conventiones in aliquo contraveniant quod dicta obligatio in suo robore firmiter perseveret In cuius rei testimonium partes predicte huic indenture sigilla sua communia alternatim apposuerunt Data die jovis in festo assentionis domini anno regni regis Edwardi tercii post conquestum tricesimo secundo Notandum quod predicta ecclesia sancte Frideswyde habuit ibidem ex dono Dionisie Burwolde viginti et sex acras terre et ex dono Simonis Malhorne xxti acras terre quarum carte postea non hic scribuntur quia ecclesia de Godestowe habet eas et tenet in excambium pro terris suis quas habuerunt in parochia sancti Clementis Oxon ut patet in cartis subscriptis de eisdem