Charter Document - 05450550
| Charter Number: | 05450550 |
|---|---|
| Cartulary Title: | The Latin Cartulary of Godstow Abbey |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1307 |
| Date type: | Internal, A.D., Feast |
| Resource Link(s): |
|
Charter:
Universis pateat per presentis quod nos Matildis abbatissa de Godestowe et eiusdem loci conventus concessimus et tradidimus domino Thome de Harpham perpetuo vicario ecclesie sancti Edwardi in Oxon aulam nostram que vocatur Shiphalle in eadem parochia cum una placea terre inter eandem aulam et tenementum quondam Johannis de Weston habendam et tenendam predictam aulam cum cameris omnibus et curia et cum predicta placea ad terminum decem annorum et si ulterius vixerit ad terminum vite sue reddendo per annum nobis et successoribus suis xxviii s pro aula cum pertinentiis et iiii s pro placea pro omnibus servitiis ad quatuor anni terminos usuales ita tamen quod predictus dominus Thomas sustentabit predictam aulam cameras omnimodas cum coquina et stabulo sumptibus propriis omnibus diebus vite sue in adeo bono statu vel meliori quo eas recepit Et placeam edificabit predictam que continet quatuor perticas et dimidiam in longitudine et sexdecim pedes in latitudine de novo sumptibus suis propriis et toto tempore suo sustentabit nec licebit eidem domino Thome predictas domos alicui alii dare tradere vel assignare nisi pro tempore suo et hoc sine preiudicio et dampno predicte abbatisse et conventus nec domos edificatas prosternere vel de dicto loco elongare Et si ita contingat quod absit quod predicte domus per defectum emendationis ruinose fuerint vel aliquo casu fortuito combuste fuerint nisi de domo vicina ignis evenerit predictus Thomas predictas domos sumptibus suis propriis reedificabit Et si in solutione dicti redditus terminis supradictis sessatum fuerit licebit predictis abbatisse et conventui per earum attornatum predicta tenementa intrare bona et catalla omnimoda in eadem inventa capere et retinere quousque dictis abbatisse et conventui tam de arreragiis redditus quam pro defectu emendationis vel reparationis domorum predictarum plenarie fuerit satisfactum per visum bonorum virorum sub pena x marcarum in subsidium terre sancte solvendarum Et si predictus dominus Thomas contra presentem conventionem in aliquo necligenter vel malitiose venerit licebit predictis abbatisse et conventui predicta tenementa intrare bona et catalla capere simul cum predictis tenementis Et ut liberum tenementum earundem retinere sine aliqua reclamatione predicti Thome non obstante aliquo privilegio universitatis Oxon indult per taxationem vel alio quoquo modo contra formam presentis scripti statuendo vel iudicando quousque dictis abbatisse et conventui fuerit plenarie de dampnis satisfactum per visum fidelium virorum Post decessum vero predicti Thome predicta tenementa edificata sine destructione aliqua vel vasto predictis religiosis mulieribus revertantur sine aliqua culumpnia heredum vel executorum predicti Thome Pro hac autem concessione et traditione solvit predictus Thomas xx et viii s et vi d premanibus In cuius rei testimonium huic scripto indentato partes altrinsecus sigilla sua apposuerunt Data apud Godestowe die sancti Michaelis anno domini millesimo tricentesimo septimo