Charter Document - 05450394
| Charter Number: | 05450394 |
|---|---|
| Cartulary Title: | The Latin Cartulary of Godstow Abbey |
| Charter Language: | Latin |
| Charter Origin: | Religious |
| Charter Type(s): | Lease |
| Date: | 1246 |
| Date type: | Internal, Regnal, Feast |
| Resource Link(s): |
|
Charter:
Omnibus Christi fidelibus presens scriptum visuris vel audituris Matillis que fuit uxor Race de Mildecumbe salutem in domino Universitati vestre notum fatio quod ego Matillis in ligia viduitate mea assensu et voluntate Roberti filii mei et heredis tradidi et concessi Jacobo de Hawncia tunc senescallo de Godestowe unam placiam de curtilagio meo ex parte aquilonari domus mee et unam dimidiam virgatam terre arabilis scilicet illam quam Galfridus faber aliquando tenuit cum omnibus pertinentiis suis excepto mesuagio et excepta una acra quam ad unum croppum percipiens alibi assignavi habendas et tenendas dicto J et assignatis suis de me et heredibus meis libere et quiete ab omni servitio et exactione seculari a secunda dominica quadragesime anno regni regis Henrici filii Johannis regis xxx usque ad festum sancti Michaelis sequens et tunc tam dicta acra quam dicta placia et dicta dimidia virgata terre in qua dicta acra continetur ipso Jacobo remanebunt usque ad finem sexdecim annorum secundum quod in cyrographo inter dictum J ex una parte et me et Robertum filium meum et heredem ex altera continetur Idem autem J recepit de me ad dictum terminum duas acras de duro blado seminatas et v acras bis aratas et non seminatas de predicta terra Et ego M et heredes mei predictam placiam et predictam terram cum pertinentiis contra omnes homines et feminas de omnibus servitiis et exactionibus et vexationibus warantizabimus aquietabimus et defendemus Pro hac autem traditione concessione et warantizatione et defensione dedit dictus Jacobus michi et Roberto filio meo et heredi vii s et vi d ad magnum negocium nostrum scilicet ad maritandas filias meas Et ut hec mea traditio et conventio et concessio firma et stabilis permaneat tam ego quam Robertus filius meus et heres presenti scripto sigilla nostra apposuimus Hiis testibus Petro botillario de Mildecumbe Thoma filio Ade Alexandro de Bussely Willelmo de Hedindone Henrico filio Edwyni Roberto molendinario Johanne de Blockesham et aliis