Charter Document - 05430077
| Charter Number: | 05430077 |
|---|---|
| Cartulary Title: | Norman Charters From English Sources [Normandy] |
| Charter Language: | Latin |
| Charter Origin: | Royal |
| Charter Type(s): | Notification |
| Date: | 1179 |
| Date type: | Internal, A.D. |
| Resource Link(s): |
|
Charter:
In nomine sancte et indiuidue Trinitatis amen Ludouicus Dei gratia Francorum rex Pium est ut que ad pias erogantur causas litterarum beneficio ad hoc indeficienti memorie tribuantur ne Deo seruientium quies perturbetur in posterum et elemosina deuote facta per obliuionem postmod[um] sopita depereat Nouerint itaque uniuersi presentes pariter ac futuri quod intuitu beatissimi martyris Thome quondam Cantuar archiepiscopi ad cuius tumulum pro salute anime et corporis in multa deuotione profecti fuimus impetranda conuentui monachorum sancte Trinitatis ibidem Deo famulantium centum modios vini ad mensuram Parisiensem singul[is] annis tempore vindemiarum in castellaria Pissiaci accipiendos in elemosinam concessimus Conuentui etiam predicto indulximus quatinus de prescriptis centum modiis vini et de omnibus que ad esum et potum suum pertinere sacramento unius seruientis de mandato alic[uius] monachi de eodem conuentu probari poterit in omnibus passagiis nostris quantum ad nos attinet sunt omnino liberi et immunes Que omnia ut perpetuam stabilitatem optineant sigilli nostri auctoritate ac regii nominis karactere subtus annotato presentem cartam precipimus communiri Actum Cantuar anno ab incarnatione domini MCLXXIX astantibus in palatio nostro quorum nomina supposita sunt et signa Sign[um] Theobaldi comitis dapiferi nostri Sign[um] Guidonis buticularii S[ignum] Reginaldi camerarii S[ignum] Radulphi constabularii Data per manum [] secundi Hugonis cancellarii