Charter Document - 05400531

Omnibus presentes litteras inspecturis abbas et prior Sancti Petri Vivi Senonensis judices a domino Papa delegati salutem in Domino Noverint universi quod cum viri religiosi abbas et conventus Sancti Benedicti Floriacensis dicerent in jure coram nobis contra Nicolaum de Sorbonio quod ipse miles ab hominibus eorum de corpore de Sorbonio indebite extorserat et extorquebat tallias justitias et exactiones in eorumdem abbatis et conventus prejudicium et gravamen unde petebant hujusmodi injuriam et interesse suum occasione dicte extorsionis facte ab ipso milite sibi emendari usque ad ducentas libras parisiensium et quod compelleretur ad desistendum a dicta extorsione cum etiam dicerent contra eumdem militem quod eum ipsi essent in possessione vel quasi omnimode juridictionis terrarum sitarum in loco qui vulgariter dicitur territorium de Sorbonio quas homines Sancti Benedicti et alii qui non sunt homines Sancti Benedicti possident et excolunt in dicto loco de Sorbonio ubi habent censum et terragium iidem abbas et conventus ipse miles eos spoliaverat de dicta juridictione indebite compellendo dictos homines coram se placitare et capiendo terras in manu sua et detinendo indebite terras quas dicti homines relinquebant et ex eis suam utilitatem faciendo in eorum prejudicium et gravamen unde petebant iidem abbas et conventus restitui a dicto milite quoad juridictionem predictam et terras predictas sibi liberari Cum etiam dicerent contra eumdem militem quod cum ipsi fuissent in possessione nemoris quod vocatur nemus de Triaumont et terragii terrarum sitarum circumque dictum nemus idem miles eos spoliaverat indebite dictis nemore et terragio vendendo dictum nemus et recipiendo dictum terragium unde petebant dictum terragium et nemus sibi restitui cum etiam dicerent contra eumdem militem quod ipse coxerat et coquebat injuste ad furnum eorum de Sorbonio in ipsorum prejudicium et gravamen et contra voluntatem eorum cum in eo furno sive furnagio coquere non deberet unde petebant sibi satisfieri a dicto milite de furnagiis non solutis usque ad valorem centum librarum parisiensium et quod de cetero furnagium eis persolvetur quotiescumque ad furnum predictum coqueret et eis dictam injuriam emendaret Cum etiam dicerent contra eumdem militem quod ipse vel ejus familia lite pendente coram nobis inter eos prioratum dictorum abbatis et conventus de Anicurte intraverat violenter et priorem ejusdem loci et familiam ejecerat et manus violentas in quosdam de familia prioris injecerat et turpiter tractaverat et equum ejusdem prioris et alia animalia et res alias ceperat et asportaverat unde petebant predicta sibi restitui et hujusmodi injuriam sibi emendari Cum etiam peterent dicerent se esse immunes ab appositione tauri et verris in villa de Sorbonio et quod prepositus de Sorbonio eorum serviens monasterio ipsorum iber remaneret ab omni exactione tallia et juridictioni domini de Sorbonio cum etiam peterent prioratum suum de Anicurte exemptum esse ab advocatione et custodia dicti militis dicentes quod dictus miles sive dominus ville de Sorbonio non poterat nec debebat facere violentiam dicto prioratui Cum etiam peterent situm granchie decimalis de Sorbonio sibi restitui a dicto milite et decimam de truncis ad granchiam decimalem reportari et terragium de via molendini sibi reddi et quod idem miles deliberaret eis viam ad molendinum si contingeret ipsos molendinum reedificare et quod servientes prioris existentes de extra villam de Sorbonio remanerent de juridictione dicti prioris Prefatus miles litem contestando predictam negavit et tandem post modum idem Nicolaus miles dominus de Sorbonio confessus fuit in jure coram nobis quod monasterium Sancti Benedicti Floriacensis habet quintam partem in nemore de Triaumont hoc salvo eidem militi quod dominus ville de Sorbonio in toto nemore de Triaumont antedicto habet usuarium suum scilicet tam in parte dicti monasterii quam in sua propria parte ad edificandum domus suas et ad ardendum in domibus suis infra terminos parochie de Sorbonio factis et faciendis ita quod dictum nemus predictum monasterium et dictus dominus insimul et pro indiviso debent accipere et possidere ita etiam quod dominus de Sorbonio quando voluerit dictum nemus vendet et tunc dictum monasterium quintum denarium totius venditionis libere percipiet et non amplius et si ad agriculturam dictum nemus redigi contigerit dictum nemus dictum monasterium quintam partem totius fundi libere habebit sed si dictus dominus ad quintum decimum annum illud vendere differret tunc monasterium antedictum vendere posset illud et quintam partem totius venditionis percipere ac tota justitia ejusdem nemoris domino ville semper libere remanebit cum autem dictus dominus vendiderit illud infra octo dies debet nuntiare mandato dicti monasterii videlicet priori de Anicurte vel ejus mandato ibidem commoranti et si mandatum monasterii infra mensem inveniret qui plus inde daret ille mercatum haberet salva palmeia primi emptoris et si dictus dominus unde aliquid haberet monasterium predictum inde quintam perciperet portionem et si forte dictum monasterium vendere contingeret aliquando illud venditionem debebit annuntiare domino et tunc fiet inter ipsos monasterium et dominum sicut superius est divisum que omnia et singula concessit et recognovit coram nobis procurator dictorum abbatis et conventus Dixit etiam et confessus fuit dictus miles quod de terris censualibus et terragialibus et alias costumas dicto monasterio debentibus quod si homines qui predicta possident et possidebunt tempore debito censum vel terragium vel alias costumas non solverint dictus abbas vel prior de Anicurte vel eorum mandatum vadia posset capere pro sua redibentia et pro quinque solidis pro emenda si voluerint et nihil amplius et quod si contigerit aliquem de villa recedere et dominum ville pro recessu suo aliquam de terris predictis saisire idem dominus dictas terras infra quadraginta dies extra manum suam debet ponere nec eas poterit onerare quin predictum monasterium medietatem oneris percipiat et si dictus dominus dictas terras infra quadraginta dies extra manum suam non poneret mandatum dicti monasterii eas aliis tradere posset possidendas illas terras dictus dominus vel dictum monasterium ad usus suos convertere non possunt nec sibi retinere que omnia et singula similiter concessit et recognovit coram nobis procurator dictorum abbatis et conventus Dixit etiam miles et confessus fuit coram nobis quod aliam justitiam omnimodam de dictis terris dominus de Sorbonio debet habere et quod situm granchie decimalis debet habere dictum monasterium et penes se remanere et quod decima de truncis debet reportari ad granchiam decimalem et quod ipse debet reddere dicto monasterio terragium de via molendini si eam contigerit excolere et quod si dictum monasterium molendinum suum reedificaret ipse dominus viam reddere debet et liberare per terram suam transeuntibus et quod prioratus de Anicurte est et debet esse in custodia et advocatione qua prius fuerat et quod non licet domino de Sorbonio violentiam aliquam in dicto prioratu facere et quod prepositus de Sorbonio serviens dicti monasterii debet esse liber et remanere eidem monasterio ab omni exactione et juridictione domini de Sorbonio et quod servientes prioris de Anicurte de extra villam de Sorbonio existentes sunt et debent esse de juridictione ejusdem prioris et quod de tauro et verre debet esse sicut prius Dixit etiam idem miles quod dominus de Sorbonio tallias justitias corveias et alias costumas hominum Sancti Benedicti Floriacensis apud Sorbonium morantium debet habere excepto omnino preposito supradicto et quod ipse dominus libere debet coquere ad furnum de Sorbonio que omnia et singula similiter recognovit et concessit coram nobis procurator dictorum abbatis et conventus et cum interrogaremus a procuratore dictorum abbatis et conventus utrum alia de intentione abbatis et conventus quam superius concessa et confessa et alio modo vellet probare ipse respondit quod non et renuntiavit omnibus aliis probationibus similiter et pars adversa Nos autem auditis que superius proposita fuerant et petita et sunt superius concessa et recognita die mercurii ante festum beati Laurentii partibus assignata ad audiendam definitivam sententiam coram nobis partibus per procuratores presentibus eadem die et sententiam ferri poscentibus de prudentium virorum consilio predictum Nicolaum de Sorbonio militem in his que superius confessus est idem miles eisdem abbati et conventui et ipsos abbatem et conventum eidem militi in his que superius eorum procurator concessit et recognovit per sententiam definitivam condemnamus eumdem militem ab omnibus aliis petitis superius per sententiam absolventes et eisdem abbati et conventui perpetuum silentium quantum ad eadem imponentes neutram partem in expensis damnis deperditis aut quibuscumque costamentis condemnantes Actum die Jovis ante festum beati Laurentii continuata a die mercurii precedenti anno Domini MCCXLI