Charter Document - 05400501

Universis presentes litteras inspecturis officialis curie Carnotensis salutem in Domino Noveritis quod Joannes de Sainvilla miles in nostra presentia constitutus majoriam suam de Sainvilla cum omnibus ad eam pertinentibus quam a religiosis viris abbate et conventu Sancti Benedicti Floriacensis tenebat et omne jus quod tam in grangia eorum ibidem sita quam extra grangiam tam in villa quam extra villam eorum de Sainvilla ratione predicte majorie quocunque modo habebat vel habere poterat redditus proventus et emolumenta quolibet modo sibi provenientia eisdem abbati et conventui vendidit penitus et quittavit promittens fide prestita corporali quod contra dictam venditionem et quittationem per se vel per alium de cetero venire nullatenus attentabit retentis sibi herbergagio et virgulto suo cum fossatis suis sicut se comportant et furno suo sicut consuerit illud tenere et habere et bosco sito prope villam sicut illum ante tenuit et habuit salvo tamen in eodem bosco usuagio hominum dictorum abbatis et conventus sicut illud capere consueverunt vinea sua et terris arabilibus videlicet quadam cultura sita juxta boscum predictum et alia cultura sita juxta vineam suam et alia secus viam de Garanceriis et alia que vocatur Cultura inter duas vias et alia sita versus Mentarvillam Campo perdito et alio campo sito versus Bolunvillam retentis etiam sibi straminibus ybernagiorum forragiis hordeorum pisorum fabarum et avenarum et paleis dictorum bladorum et omnibus aliis forragiis quecunque sint extra granum exceptis vetiis et vetiarum forragiis que tamen palee dictorum bladorum ventilabuntur ad voluntatem dictorum abbatis et conventus prout eis videbitur expedire et retentis ipsi Joanni hominibus de ipso tenentibus in feodum videlicet nobili muliere Desiderata relicta Renaudi de Garnovoisin militis Renaudo de Rovrayo milite et Gervasio feodato et aliis qui de feodo dicti Guillelmi tenent in parochia de Sainvilla cum heredibus eorum qui pro tempore succedent in feodis supradictis et hec omnia supradicta possidebit et habebit sicut superius est expressum de quibus videlicet rebus sic retentis dictus Joannes fecit dictis abbati et conventui homagium et ipsi ipsum in hominem ligium receperunt ita quod justificabit se coram illis apud Sanctum Benedictum secundum usus et consuetudines castellanie Stampensis successores autem ejusdem Joannis qui res predictas tenebunt abbati qui pro tempore fuerit facient homagium de rebus superius nominatis item conventum est inter dictos abbatem et conventum et dictum Joannem quod ipsi abbas et conventus grangiam sitam juxta ecclesiam de Sainvilla tenebunt et habebunt libere et quiete cum curia sicut se comportat ita quod idem Joannes forragia extra aream in quadam parte curie posita infra hebdomadam postquam triturabuntur de ipsa curia tenebitur removere alioquin ea facerent dicti abbas et conventus ad sumptus suos removeri de quibus forragiis servientes eorum quamdiu morabuntur ibi pro trituratione bladorum sine combustione et donatione habere poterunt et habebunt secundum quod sibi et equis suis si quos habeant erit necessarium Sterquilinium autem et palea post recessum dictorum servientum eidem Joanni remanebunt receptionem autem reddituum quam faciebat pro nobili viro Philippo comite Bertaudi curie ab hominibus de Sainvilla dictis abbati et conventui penitus quittavit idem Joannes et nihil juris sibi de cetero reclamabit Pro hac autem redditione et quittatione facta dederunt dicti abbas et conventus predicto Joanni quater centum et quinquaginta libras parisiensium de quibus idem Joannes se tenuit pro pagato Agnes vero nobilis mulier uxor ejusdem Joannis coram nobis predictam venditionem voluit laudavit pariter et concessit spontanea non coacta promittens fide prestita quod in rebus taliter venditis nihil juris ratione dotalitii vel alio quocunque modo per se vel per alium de cetero reclamabit In cujus rei memoriam et stabilitatem perpetuam presentes litteras sigilli curie Carnotensis munimine fecimus roborari Actum anno Domini millesimo ducentesimo tricesimo octavo mense junio